सिन्जा गाउँपालिका, जुम्लामा विभिन्न नसर्ने रोगहरूको जाँच तथा उपचारका लागि एक दिने निःशुल्क स्वास्थ्य शिविर सम्पन्न भएको छ। फागुन २८ गते आधारभूत स्वास्थ्य सेवा केन्द्र, बिष्टबाडामा सम्पन्न उक्त शिविर जनस्वास्थ्य कार्यालय जुम्लाको सहयोग, पेश नेपाल जुम्लाको समन्वय तथा सिन्जा गाउँपालिका स्वास्थ्य शाखाको आयोजनामा गरिएको थियो।

स्वास्थ्य संयोजक ललित रोकायाका अनुसार शिविरमा २७३ जनाले विभिन्न स्वास्थ्य सेवा प्राप्त गरेका थिए। तीमध्ये २११ जना महिला र ६२ जना पुरुष रहेका थिए। शिविरमा जनरल स्वास्थ्य परीक्षण, रक्तचाप, मधुमेह, पिसाबमा प्रोटीन, शरीरको तौल तथा उचाइ मापन, महिलाको पाठेघर तथा क्यान्सरसम्बन्धी जाँच गरिएको थियो।

शिविरमा २७३ जनाको रक्तचाप जाँच गरिएकोमा १८ जनामा उच्च रक्तचाप पाइएको थियो। यस्तै, २०० जनाको रक्तमा सुगर परीक्षण गरिएकोमा ११ जनामा मधुमेह देखिएको थियो। पिसाबमा प्रोटीन परीक्षण गर्दा ५ जनामा पोजिटिभ देखिएको थियो। महिलाहरूको पाठेघर तथा क्यान्सरसम्बन्धी VIA परीक्षणमा १४४ जना सहभागी भए पनि कुनै पनि पोजिटिभ केस देखिएन।

शिविरमा ७ जना महिलाले रिङ पेसरी प्रयोग गरेका थिए भने २ जनामा पाठेघरको शल्यक्रिया गर्नुपर्ने देखिएको थियो। यस्तै, पाठेघरसम्बन्धी समस्याका कारण थप उपचार आवश्यक परेका २६ जना महिलालाई रेफर गरिएको थियो।

स्थानीयस्तरमै निःशुल्क स्वास्थ्य सेवा प्राप्त गर्न पाउँदा सेवाग्राहीहरू खुशी भएका थिए। सफलतापूर्वक सम्पन्न उक्त शिविरमा सहयोग गर्ने सम्पूर्ण सरोकारवालाहरूप्रति आयोजक पक्षले आभार व्यक्त गरेको छ।