तस्बिर : कनका खबर ग्राफिक्स

स्याउको टोकरीबाट
एउटा स्याउ कुहिन्छ
कोठा गन्हाउन्छ
हामी कोठामा स्प्रे गर्छौं
ऊ घरीघरी गन्हाइरहन्छ
हामी घरीघरी स्प्रे गर्छौं
हेर्दा हेर्दै,
ऊ सबै स्याउलाई
कुहाउने हैसियत राख्छ
र अरु स्याउ पनि कुहिन तयार हुन्छन्,
तैपनि हामी फेरी भन्छौं,
कोठा गन्हाएछ
अनि फिनाइलको जोखो गर्छौं
तर टोकरी हेर्दैहेर्दैनौं,
अर्थात् टोकरी त हेर्नै चाहन्नौं।

किनकी,
हामीलाई नकुहिएको स्याउसँगै
कुहिएको स्याउ पनि बिकाउनु छ।

लाग्छ कि यस्तै हालतमा,
पक्कै पनि एक दिन
टोकरीका सबै स्याउ कुहिनेछन्
अनि कोठा मात्र होइन
त्यो बेला पुरै घर गन्हाउनेछ
र समाज पनि गन्हाउनेछ
साथै टोकरी रित्तिनेछ
जबसम्म,
कुहिएको स्याउ
त्यहाँ,
त्यो टोकरीमा रहनेछ ।

त्यसैले त,
आऊ साथी
नकुहिएका स्याउहरु बचाउन
टोकरी भित्रबाट अब
कुहिएको स्याउ फालौं
र कोठा गन्हाउनबाट बचाऔं।