नेपाली कांग्रेसको १५औँ महाधिवेशनको तयारी तीव्र पारिए पनि पार्टीभित्रको विवाद भने अझै समाधान हुन सकेको छैन । संस्थापन पक्षले यही असोज १६ देखि १९ गतेसम्म काठमाडौँमा १५औँ महाधिवेशन गर्ने गरी निर्वाचन प्रक्रिया अघि बढाइरहेको छ भने संस्थापनइतर समूहले उक्त कार्यतालिका अस्वीकार गर्दै छुट्टै प्रक्रिया अघि बढाउने तयारी गरेको छ ।

संस्थापन पक्षले आयोजना गर्न लागेको महाधिवेशनमा करिब ७ हजार प्रतिनिधि सहभागी हुने कांग्रेस निर्वाचन समितिले जनाएको छ । बुधवार आयोजित पत्रकार सम्मेलनमा निर्वाचन समितिका सदस्य राजु नेपालले करिब सात हजारको हाराहारीमा महाधिवेशन प्रतिनिधि सहभागी हुने जानकारी दिनुभएको छ ।
कांग्रेसका अनुसार रसुवा, नुवाकोट र धादिङलगायत केही जिल्लाको विवरणबाहेक पार्टीमा करिब ८ लाख ७० हजार क्रियाशील सदस्य रहेका छन् । महाधिवेशनअन्तर्गत वडा तहदेखि नै नेतृत्व चयनको प्रक्रिया अघि बढिरहेको छ ।

महाधिवेशनलाई व्यवस्थित र पारदर्शी बनाउन देशभर करिब ९ हजार निर्वाचन अधिकृत परिचालन गरिएको कांग्रेसले जनाएको छ । वडा तहसम्म निर्वाचन प्रक्रिया सञ्चालन गर्न स्थानीय पार्टी संरचनासँग समन्वय गरेर निर्वाचन अधिकृतहरू परिचालन गरिएको हो ।
कांग्रेस केन्द्रीय निर्वाचन समितिले यसअघि सार्वजनिक गरेको कार्यतालिकाअनुसार ६ हजार ७ सय ४३ वटै वडामा अधिवेशन गरी क्षेत्रीय प्रतिनिधि चयन गर्ने, त्यसपछि पालिका, प्रदेशसभा क्षेत्र, प्रतिनिधिसभा क्षेत्र, जिल्ला र प्रदेश अधिवेशन सम्पन्न गरेर असोज १६ देखि १९ गतेसम्म केन्द्रीय महाधिवेशन गर्ने कार्यक्रम छ ।
निर्वाचन समितिका अनुसार अधिकांश जिल्लामा निर्वाचनसम्बन्धी सामग्री तथा प्रक्रिया अघि बढिसकेको छ । वडा तहदेखि सुरु हुने निर्वाचन प्रक्रियामार्फत कांग्रेसले देशभर ठूलो संख्यामा नयाँ नेतृत्व चयन गर्नेछ ।