जुम्लाको पातारासी गाउँपालिकामा संयुक्त राष्ट्र विकास कार्यक्रम (युएनडीपी) ले स्वीडिश इन्टरनेशनल डेभलपमेन्ट को अपरेसन एजेन्सी (एआईडीए) को कार्ययोजना अन्तर्गत कुल ३ लाख ५७ हजार ४१०.८० रुपैयाँ मूल्य बराबरका उपकरण र सामग्री हस्तान्तरण गरेको छ।
युएनडीपीका उप आवासीय प्रतिनिधि जुलियन चेभिलार्ड द्वारा पातारासी गाउँपालिकाका अध्यक्ष पूर्णसिंह बोहोरालाई सामग्री हस्तान्तरण गरिएको हो ।
यो कार्यक्रममा युएनडीपीका पोर्टफोलियो प्रबन्धक प्रज्ञाजन वाई राई, परियोजना अधिकृत रसु मानन्धर, बाल गुरुङ (एएफओ, युएनडीपी), ऋषि ओली (रेरास परियोजना, युएनडीपी) र सबिल मूल (प्रिज्म कन्सल्टेन्सी) रूपमा उपस्थित थिए।
हस्तान्तरण गरिएका सामग्रीहरू खासगरी स्याउ र सिमीको व्यापार योजनालाई मजबुत बनाउन प्रयोग हुने खालका छन्। जुन युएनडीपीको खरीद नीतिअनुसार खरिद गरिएको जानकारी दिइएको छ।
यो सहयोगले स्थानीय उत्पादनलाई बजारसम्म पुर्याउन र किसानहरूलाई आत्मनिर्भर बनाउँदै व्यवसायी बन्न प्रेरित गर्ने पातारासी गाउँपालिकाका अध्यक्ष पूर्णसिंह बोहोराले बताए।
उनले भने, “यो सहयोगले हाम्रा उत्पादनहरूको बजार पहुँच बढाउनेछ र गाउँपालिकालाई आर्थिक रूपमा सशक्त बनाउने छ।”
पातारासीका किसानहरूले परम्परागत रूपमा स्याउ र सिमीको खेती गर्दै आएका छन्, तर उचित उपकरण र प्रविधिको अभावमा उत्पादन र बजार विस्तारमा कठिनाइ भोग्दै आएका थिए।
युएनडीपीको यो सहयोगले ती समस्याहरू समाधान गर्न महत्वपूर्ण भूमिका खेल्ने विश्वास गरिएको छ।
यो सहयोगले विशेषगरी महिला सशक्तीकरणमा ठूलो प्रभाव पार्ने गाउँपालिकाकी उपाध्यक्ष जनमाया रोकायाले बताइन्।
उनले भनिन्, “यी सामग्रीहरूले उत्पादन क्षमता बढाउनेछ र महिलाहरूलाई आर्थिक रूपमा बलियो बनाउन मद्दत गर्नेछ। हाम्रा गाउँका महिलाहरूले अब आफ्नो मेहनतको फल आफैं बजारसम्म पुर्याउन सक्नेछन्।”
पातारासीमा महिलाहरू कृषि कार्यमा सक्रिय छन् र यो सहयोगले उनीहरूको श्रमलाई थप प्रभावकारी बनाउने अपेक्षा गरिएको छ।
कनका खबर । २०८१ चैत्र १०