जुम्ला — स्थानीय तह संस्थागत क्षमता स्वमूल्यांकन (LISA) मूल्याङ्कन प्रणालीअनुसार जुम्लाको तातोपानी गाउँपालिका पहिलो स्थानमा उभिएको छ। स्थानीय तहहरूको कार्यक्षमता, पारदर्शिता, बजेट व्यवस्थापन, योजना कार्यान्वयन, लेखा प्रणाली तथा निगरानी प्रक्रियाको आधारमा गरिएको मूल्यांकनमा तातोपानीले उच्च अंक प्राप्त गरेको हो।

प्राप्त विवरणअनुसार, तातोपानी गाउँपालिकाले समग्रमा ९८.८१ प्रतिशत अंक प्राप्त गर्दै जुम्लाका अन्य पालिकाहरूलाई पछि पार्दै पहिलो स्थान हासिल गरेको छ। यस मूल्यांकनमा कनकासुन्दरी गाउँपालिकाले ९२ प्रतिशत अंक प्राप्त गर्दै दोस्रो स्थानमा रहँदा, हिम गाउँपालिकाले ६९.५ प्रतिशत अंकसहित तेस्रो स्थान हासिल गरेको छ।

तातोपानी गाउँपालिकाले वित्तीय सुशासन जोखिम मूल्यांकनमा पनि उत्कृष्ट प्रदर्शन गरेको छ। योजना, बजेट तथा कार्यक्रम व्यवस्थापनमा ७१.७४ प्रतिशत, कार्यान्वयन क्षमता तथा व्यवस्थापनमा ७१.१३ प्रतिशत, लेखा प्रणाली तथा वित्तीय व्यवस्थापनमा ७२.२६ प्रतिशत, अनुगमन, मूल्यांकन तथा लेखापरीक्षणमा ५२.७५ प्रतिशत, र राजस्व व्यवस्थापनमा ६०.३५ प्रतिशत अंक प्राप्त गरेको छ। समग्रमा, तातोपानी गाउँपालिकाको मूल्यांकन ९० प्रतिशत रहेको छ, भने स्थानीय आर्थिक विकास मूल्यांकन (LED) मा ९२ प्रतिशत अंक प्राप्त गरेको छ। यो मुल्यांकन भाग लिने जुम्लाको तातोपानी गाउँपालिका एक मात्र हो

तातोपानी गाउँपालिकाले राम्रो शासन प्रणाली, पारदर्शिता, तथा वित्तीय व्यवस्थापनमार्फत उत्कृष्ट प्रदर्शन गरेको भन्दै अन्य स्थानीय तहहरूले पनि यसबाट सिक्नुपर्ने विज्ञहरू बताउँछन्। स्थानीय तहहरूको कार्यसम्पादन मूल्यांकनले आगामी दिनमा अझ प्रभावकारी सेवा प्रवाहमा टेवा पुर्‍याउने विश्वास गरिएको छ।