जुम्लाको तिला गाउँपालिकाको आर्थिक वर्ष २०८०।०८१ को सार्वजनिक सुनुवाई सम्पन्न भएको छ। तिला गाउँपालिकाकाको आयोजना तथा तातोपानी मल्टिमिडिया प्रा.ली.को सहजिकरणमा सार्वजनिक सुनुवाई कार्यक्रम गरिएको हो ।
शुक्रबार गाउँपालिकाको सभा हलमा सम्पन्न भएको सार्वजनिक सुनुवाईमा वर्षभरि संचालन भएका योजना तथा कार्यक्रम र आय व्यय प्रस्तुत गरिएको हो।
पालिकाले आव २०८०।८१ मा ५१ करोड २४ लाख ३७ हजार ७९७ अनुमानित बजेट ल्याएको थियो । यसमा कुल बजेटको ८० दशमलव ०१ प्रतिशत खर्च गरेको छ । चालुतर्फ ९१ दशमलव ८८ प्रतिशत खर्च गरेको गाउँपालिकाले पुँजीगततर्फ ५८ दशमलव ०८ प्रतिशत खर्च भएको गाउँपालिकाका निमित्त प्रमुख प्रशासकीय अधिकृत जानकी हितानले बताएकी छन् ।
उनकाअनुसार पालिका आ.व २०८०।८१ मा १८ लाख २६ हजार आन्तरिक राजस्व सङ्कलन गर्न सफल भएको छ ।
गाउँपालिकाले वर्षभरी गरिएका योजना तथा प्रदान गरिएका सेवाको पादर्शीता सुनिश्चीत गर्नका लागी गाउँपालिकाले प्रत्येक वर्ष सार्वजनिक सुनुवाई गर्ने गरेको गाउँपालिकाका अध्यक्ष मोतीलाल रोकायाले बताए।
उनकाअनुसार संघीय,विशेष र समपुरक अनुदान र प्रदेशको विशेष र समपुरक अनुदानबाट गाउँपालिकाद्धारा कार्यान्वयन भएका गौरबका योजना निर्माण भई संचालनमा आएकाछन्।
जसमध्ये गाउँपालिकाको प्रशासकीय भवन,तलिचौरदेखी लासिसम्म तटबन्ध निर्माण,कुडारी बजारदेखी डुङ्ग्री गाउँसम्म सडक स्तरउन्नती,राँसादेखी नदैगुफा सडक निर्माण,दश शैया अस्पताल निर्माणधिन अवस्था,रासाँदेखी पुरु हुँदै जुम्लाकोट मानेचौरसम्म सडक निर्माण,रारा खानेपानी योजना निर्माणधिन र वडा नं. ५ को वडा कार्यालय निर्माण भएका छन् ।
विकास निर्माणका काम लाई गति दिनका लागि पालिकाले ठुला योजनालाई विशेष प्रथामिकतामा राखेर पालिकाले काम गरेको गाउँपालिका उपाध्यक्ष गोरीकला बुढाको भनाइ छ ।
कार्यक्रमका सहभागीले गाउँपालिकाको विकासका लागी साना भन्दा पनि ठुला योजनामा केन्द्रीत भएर लाग्न सुझाब दिएका छन । सहभागीले सेवा प्रवाहको गुनासो तथा विकास निर्माणका काम बारे प्रश्न तथा सुझाब दिएका छन्।
सार्वजनिक सुनुवाइमा उपस्थित नागरिक, राजनीतिक दलका प्रतिनिधी ,सुरक्षाकर्मी,पत्रकार तथा प्रतिनिधिले गाउँपालिकाको बजेट तथा सेवा प्रवाहका विषयमा प्रश्न गरेका थिए ।
कनका खबर । २०८१ फाल्गुन २