हिमपातको चुनौतीबीच सफल उपचार
मुगु, – सुत्केरी व्यथाले च्यापिएकी छायाँनाथ रारा नगरपालिका–१३, लुमा गाउँकी २५ वर्षीया ठुमा खड्कालाई हेलिकोप्टरमार्फत उद्धार गरिएको छ। बुधबार रातिदेखि व्यथाले पीडित खड्कालाई बिहीबार बिहान १० बजे जिल्ला अस्पताल पु-याइएको थियो।
जिल्ला अस्पताल मुगुमा आवश्यक सर्जिकल सुविधा अभाव रहेकोले उनलाई सुर्खेतको प्रदेश अस्पतालमा रेफर गरिएको हो। जिल्ला अस्पतालका प्रमुख डा. निर्मल नगरकोटीका अनुसार, बच्चा पाठेघरमा उल्टो अवस्थामा रहेकाले तुरुन्त सर्जरी गर्नुपर्ने अवस्था थियो। यसअघि पनि सर्जरीबाट बच्चा जन्माएकी खड्काको यो दोस्रो आपतकालीन सर्जरी हो।
हिमपात र प्रतिकूल मौसमका बाबजुद हेलिकोप्टरमार्फत खड्कालाई उद्धार गरी उपचारका लागि समयमै अस्पताल पु-याउन सकिएको छ। खड्काका श्रीमान् राजबहादुर खड्काले यस्तो विषम परिस्थितिमा उद्धार सम्भव भएकामा ठूलो राहत महसुस भएको बताए।
यस घटनाले दुर्गम क्षेत्रका स्वास्थ्य सेवामा रहेको अभावलाई पुनः उजागर गरेको छ। स्थानीयबासी र स्वास्थ्यकर्मीहरूले दुर्गम जिल्लामा अत्यावश्यक स्वास्थ्य सेवा र उपकरण उपलब्ध गराउन सरकारी निकायले प्राथमिकता दिनुपर्ने आवश्यकता औंल्याएका छन्।
मोहन शाही । २०८१ माघ ४