देउसी भैलो खेलबाट संकलित पैसाले गाउँ गाउँमा स्ट्रेचर वितरण

जुम्ला जिल्ला हिमा गाउँपालिका वडा नं ३ का राहदेब हरियाली देउसी भैलो टिमले यस वर्षको देउसी खेललाई सामाजिक कार्यमा रूपान्तरण गर्दै उदाहरणीय कार्य गरेको छ। देउसी भैलो खेलबाट संकलित रकमलाई सामुदायिक हितमा प्रयोग गरी यो टिमले स्थानीय स्तरमा सहयोग पुर्‍याउने उद्देश्यसहित विभिन्न सहयोगका कार्यक्रम अघि सारेको छ। देउसी भैलो खेलमा सहभागी भएर संकलित एक लाख उन्नाईस हजार रुपैयाँको रकमबाट हिमा गाउँपालिका वडा नं ३ भित्रका नौ वटा टोलमा स्ट्रेचर वितरण गरिएको छ, जसले स्वास्थ्य आपत्कालीन अवस्थामा ग्रामीण जनतालाई सहजता प्रदान गर्नेछ।

देउसी खेलबाट उठेको रकमलाई परम्परागत र रमाइलो मात्र नभई समाजमा ठोस योगदान पुर्‍याउन प्रयोग गर्ने उद्देश्यसहित यो कार्य गरिएको हो। राहदेब हरियाली देउसी भैलो टिमका प्रमुख अगुवा तथा युवा नेता राजेन्द्र रोकायाले देउसी खेलबाट समाजलाई एकजुट गराउने प्रयास स्वरूप संकलित रकमले सामूहिक भोज आयोजना गरि बाँकी रकमलाई वडाका आवश्यकताअनुसार समाजको हितमा खर्च गरिएको जानकारी दिए। रोकायाका अनुसार, स्ट्रेचर वितरणको यो कार्य गाउँभित्र स्वास्थ्य सेवा सहज बनाउनेतर्फ टिमको पहिलो प्रयास हो। टोल–टोलमा स्ट्रेचर पु¥याइ स्वास्थ्य समस्याका बेला बिरामीलाई समयमै स्वास्थ्य सेवा केन्द्रमा पु¥याउन सहयोग मिल्नेमा उनी विश्वस्त छन्।

सामाजिक सेवामा योगदान पुर्‍याउन देउसी भैलो खेलको रकमलाई यस्ता कार्यमा लगानी गर्ने यो प्रयासले ग्रामीण भेगमा जनताको ठूलो सहयोग प्राप्त गरेको छ। त्यस्तै, वडाभरि खानेपानीको सहजता र अन्य आधारभूत पूर्वाधारको व्यवस्थापन पनि टिमको प्राथमिकतामा रहेको रोकायाले थप जानकारी दिए। यस्ता कार्यक्रम मार्फत गाउँको विकास र सहकार्यलाई सुदृढ बनाउन टिमले आगामी दिनमा यस्तै प्रकारका कार्यक्रम निरन्तर सञ्चालन गर्ने योजना बनाएको छ।

राहदेब हरियाली देउसी भैलो टिमको यस कार्यमा स्थानीय समुदायको पनि ठूलो सहभागिता र सहयोग रहेको छ। सामुदायिक संकलनबाट प्राप्त रकमले वडा नम्बर ३ का विभिन्न टोलहरूमा स्ट्रेचर उपलब्ध गराइने र यसबाट स्वास्थ्य क्षेत्रमा तत्कालीन समस्यामा सहजीकरण गरिने बताइएको छ। यस टिमका अगुवाहरूका अनुसार, यस प्रकारका साना साना प्रयासहरूले गाउँका आवश्यकताहरू पूरा गर्न मद्दत गर्ने विश्वास लिएका छन्।

सामाजिक हितका लागि आयोजित यो कार्यक्रममा स्थानीय हर्क बहादुर रोकायाको अध्यक्षतामा, वडा अध्यक्ष धनबिर रोकाया, कार्यपालिका सदस्य परिलाल बि.क, युवा नेता राजेन्द्र रोकायाको नेतृत्वमा स्ट्रेचर वितरण गरिएको हो। यसले स्वास्थ्य क्षेत्रमा तात्कालिक सहायताका लागि ग्रामीण जनतालाई सहयोग पुग्ने विश्वास गरिएका कारण कार्यक्रममा जनसमुदायको उत्साहपूर्ण सहभागिता रहेको थियो।

वडामा रहेका विभिन्न संरचनागत समस्याहरू, आधारभूत आवश्यकताहरूको व्यवस्थापन र सामाजिक सेवामा टिमको यो कदम निकै प्रेरणादायी देखिएको छ। देउसी भैलो खेलजस्तो परम्परागत संस्कृति मात्र नभई, यसलाई समाजसेवामा जोडेर उदाहरणीय कार्य गरिएपछि वडाभरि यसको सराहना भइरहेको छ। यो कार्यले अरू वडामा पनि यस्तै प्रकारका सामुदायिक सेवामा आधारित देउसी भैलो खेलको परिपाटी सुरु गर्ने प्रेरणा मिलेको छ।

युवा नेता रोकायाको नेतृत्वमा गठित राहदेब हरियाली देउसी भैलो टिमले समाजमा सकारात्मक परिवर्तन ल्याउन, सहकार्यलाई बढावा दिन र वडाका आवश्यकता सम्बोधन गर्न अन्य कार्यक्रमहरू पनि सञ्चालन गर्ने जनाएको छ। गाउँलेहरूका अनुसार, यस प्रकारका प्रयासहरूले स्थानीय जनताको आवश्यकता सम्बोधन गर्दै समाजलाई एकजुट गर्ने विश्वास छ।

 

प्रकाशित मितिः   २०८१ कार्तिक २२ at 2:52 pm 

  • कमेन्ट (Comment)