युवा पत्रकारिता पुरस्कार ग्रहण गर्दै पत्रकार सागर परियार । तस्बिर : कनका खबर
पत्रकार सागर परियार युवा तथा खेलकुद पत्रकारिता पुरस्कारबाट सम्मानित भएका छन्।
बुधबार राजधानी काठमाडौंमा आयोजित राष्ट्रिय युवा प्रतिभा सम्मान तथा युवा पत्रकारिता पुरस्कार वितरण कार्यक्रममा पत्रकार परियार सम्मानित भएका हुन।
२०७२ सालबाट रेडियोबाट पत्रकारिता सुरुवात गरेका पत्रकार परियार त्यसकाे तीन वर्षपछि लगातार लेखन क्षेत्रमा क्रियाशील छन्।
रेडियाे पत्रकारिता र लेखनमा उत्कृष्ट रिपोर्टिङ गर्दै आएका उनकाे कर्मलाई मूल्यांकन गरि युवा तथा खेलकुद मन्त्रालयले युवा पत्रकारिता पुरस्कार दिएको हो।
व्यवसायीक पत्रकारिताकाे जग बलियाे बनाउन महत्त्वपूर्ण याेगदान गरेका पत्रकार परियार जुम्लाकाे दाेस्राे दैनिक पत्रिका कर्णालीपोष्ट दैनिकको कार्यकारी सम्पादक समेत छन्।
उनी जुम्लाको चर्चित अनलाइन कर्णाली मिसनका प्रकाशक समेत हुन भने विगत आठ वर्षदेखि कारोबार राष्ट्रिय आर्थिक दैनिकमा निरन्तर काम गर्दै आएका छन्।
स्थानीय एफ एम रेडियाे कर्णालीबाट सिकेकाे सीपलाई निरन्तरता दिन विगत पाँच वर्ष यता रेडियो नेपालमा समेत पत्रकारिता गरिरहेका छन्।
स्थानीय देखि राष्ट्रियस्तरका संचार माध्यममार्फत विकटका समाचार प्रकाशन तथा प्रसारण गर्ने उनी पत्रकार हक हितका लागि अनवरत रुपमा संघर्ष गर्दै आएकाे नेपाल पत्रकार महासंघ शाखा जुम्लाको सहसचिव समेत छन्।
सत्य र निस्पक्षतालाई आत्मसाथ गरी सामाजिक सशक्तिकरणका लागि व्यवसायीक पत्रकारिता अंगालेका उनले युवा पत्रकारिता पुरस्कार पाउँदा उत्साहित भएकाे बताए।
‘याे मेराे लागि निकै खुसीको कुरा हाे। पत्रकारिता क्षेत्रमा मैले देखेकाे भविष्यलाई अझ दृढ हुन मद्दत मिल्नेछ।’
उनले भने, ‘म मेरो कर्ममा तल्लीन भइराख्दा बेलाबखत आउने खुसीहरुले मलाई थप उत्प्ररेण र हौसला प्रदान गर्नुका साथै जिम्मेवारी बढेको महसुश हुन्छ।’
महेश नेपाली । २०८१ असार २६