विपन्न विद्यार्थीलाई शैक्षिक सामग्री हस्तान्तरण गर्दै नेपाल मोबाइल व्यवसायी महासंघका प्रतिनिधिहरु । तस्बिर : कनका खबर
नेपाल मोबाइल व्यवसायी महासंघ जुम्लाले स्थापना दिवसको अवसरमा विपन्न विद्यार्थीलाई स्टेसनरी सामग्री वितरण गरेको छ।
जुम्ला स्थित मोबाइल व्यापारीहरुले कर्णाली मावि अनामनगरका विपन्न विद्यार्थीलाई स्टेसनरी वितरण गरेको नेपाल मोबाइल व्यवसायी महासंघ कर्णालीका वरिष्ठ उपाध्यक्ष बालकृष्ण बुढाले बताए।
‘हामीले विपन्न बालबालिकालाई थोरै भए पनि शैक्षिक सामग्री दिएका छौं,’ उनले भने, ‘स्थापना दिवसको अवसरमा सेवामुलक गतिविधि गर्न पाउँदा खुसी छौं।’
विपन्न विद्यार्थी पढिरहेको कर्णाली माविमा सहयोग गरि राहत पुगाएको भन्दै अनामनगरका प्रधानाध्यापक मिनराज शर्माले नेपाल मोबाइल व्यवसायी महासंघलाई धन्यवाद दिए।
‘सरकारी विद्यालयमा पढ्ने विपन्न विद्यार्थीका अनेक समस्या छन्,’ उनले भने, ‘विविध समस्यासँग जुधिरहेका उनीहरुको मुख्य समस्या कापीकलम जुटाउन नसक्नु पनि हो।’
उनका अनुसार यस्तो अवस्थाका विद्यार्थीलाई सहयोग गर्नु पुण्यको काम हो।
कार्यक्रममा नेपाल मोबाइल व्यवसायी महासंघका जिल्ला सचिव कमल शाही, प्रकाश बुढा, रविन्द्र बुढथापा, आरपी सिंह लगायतको उपस्थिति रहेको थियोे।
कनका खबर । २०८१ असार २७