कर्णाली स्वास्थ्य विज्ञान प्रतिष्ठानका उपकुलपति डा. मंगल रावल र रजिस्ट्रार नृपेन्द्र महतलाई ध्यानाकर्षण पत्र बुझाउँदै नेविसंघ अध्यक्ष महेश हमाल र तरुण दल अध्यक्ष हेम बुढथापा । तस्बिर : कनका खबर

नेपाली काँग्रेसको भातृ संगठन नेपाल विद्यार्थी संघ र नेपाल तरूण दल जुम्ला स्थित कर्णाली स्वास्थ्य विज्ञान प्रतिष्ठानमा अनियमितता भएको भन्दै आन्दोलन थालेको छ।

सुरुमा कर्णाली स्वास्थ्य विज्ञान प्रतिष्ठानका उपकुलपति र रजिस्ट्रारसँग डेलिसन गई विविध विषयमा छलफल चलाएको काँग्रेस पछिल्लो समय रुड बन्दै गइरहेको छ।

खासगरी नेपाली कांग्रेस जुम्लाका सचिव अर्जुनसिंह कठायतले सामाजिक संजालानमा लेखेर प्रतिष्ठानका उपकुलपति लगायत पदाधिकारीको विरोध गरेपछि कांग्रेसका दुई जनवर्गीय संगठन कर्णाली स्वास्थ्य विज्ञान प्रतिष्ठान विरुद्ध खुलेर लागेका हुन।

आइतबार जुलुस सहित प्रतिष्ठान पुगेको युवा विद्यार्थीको टोलीले कर्णाली स्वास्थ्य विज्ञान प्रतिष्ठानका उपकुलपति डा. मंगल रावललाई २२ बुँदे ध्यानाकर्षण पत्र बुझाएको हो।

संयुक्त रुपमा दुबै संगठनले प्रतिष्ठानको वर्तमान नेतृत्वले असक्षमता देखाउँदा अनियमिता बढ्दै गएको भन्दै समस्याहरु तत्काल सुल्झाउन माग राखेका हुन।

ध्यानाकर्षण पत्रमा अनियमितताको लामो फेहरिस्त प्रस्तुत गरेर विरोध जनाएका नेविसंघ र तरुण दलले आफूले ध्यानाकर्षण पत्र मार्फत उठाएका समस्या सुल्झाउन ४८ घण्टे अल्टिमेटम समेत दिएका छन्।

प्रतिष्ठानमा उपचारका क्रममा आउने बिरामीहरुले सहज उपचार नपाउनु, अध्ययनका लागि आएका विद्यार्थीहरुले असल शैक्षिक वातावरण नपाउनु, पढाउने प्राध्यापक नहुन, बिरामी प्रति सेवारत चिकित्सक स्वास्थ्यकर्मीको व्यवहार राम्रो नहुनु, नेतृत्व जुम्लामा नबसी काठमाडौंमा बसेर कर्णालीको सेवा सुविधा उपभोग गर्नु, अस्पतालको सेवा लथालिङ्ग बनाउनु लगायतका अनियमिता गरेको हुनाले आन्दोलनमा उत्रिन बाध्य भएको तरुण दल जुम्लाका अध्यक्ष हेम बुढथापाले बताए।

नेविसंघ जुम्लाका अध्यक्ष महेश हमाल र नेपाल तरूण दल जुम्लाका अध्यक्ष हेम बुढ्थापाद्वारा हस्ताक्षरित ध्यानाकर्षण पत्रमा किड्नी डाइलासिस सेवा सुचारू हुनुपर्ने, भिडियो एक्सरे सेवा सुरू हुनुपर्ने र एम्बुलेन्स सेवा नियमित हुनुपर्ने लगायतका माग गरेका छन्।

प्रतिष्ठानका उपकूलपति डा. मंगल रावल तत्कालिन अवस्थामा अस्पताल निर्देशक, कार्यकारी परिषदको सदस्य र सभा सदस्य हुँदाका बखत सामाजिक संजालमा लेख्ने गरेको बेला कुनै कारबाही नगरिने र हाल केही कर्मचारीले प्रतिष्ठानको अनियमितताका कुरा उठाउँदा कारबाही गर्न खोजिएको भन्दै उनीहरुले आपत्ति जनाएको तरुण दल जुम्लाका अध्यक्ष बुढथापाको भनाइ छ।

उनल भने, ‘हालका उपकुलपतिको विगत हेर्ने हो भने उहाँलाई पदमा बसिरहने नैतिक अधिकार छैन। तत्काल राजिनामा दिनुपर्ने हो। रजिष्ट्रार नृपेन्द्र महतले प्रतिष्ठानको सार्वजनिक पद धारण गरी नेकपा एमालेको जिल्ला अधिवेशनको निर्वाचन अधिकृतको रुपमा खटिई पार्टिगत गतिविधि अगाडि बढाएको हुनाले पनि निजलाई कारबाही हुनुपर्छ।’

विभिन्न माग राखि बुझाएको ध्यानाकर्षण पत्र बुझ्दै प्रतिष्ठानका उपकुलपति डा. रावलले नेविसंघ र तरु दलले राखेका मागको विषयमा प्रतिष्ठानको शिक्षा हेरिरहेका डीन र अस्पताल हेरिरहेका निर्देशकसँग बुझेर हरेक बुँदामा चित्तबुझ्दो जवाफ दिने बताए।

उनले भने, ‘सबै विषय मसँग सम्बन्धित छैनन्। प्रतिष्ठानको तहगत संरचना छ। सबै संयन्त्रसँग जाँचबुझ गरि उहाँहरुका प्रश्नको जवाफ दिनेछु। तर धेरै कुरा प्रशासनिक सुधारको भएको हुनाले रजिस्ट्रारले जवाफ दिनु हुनेछ। तथापि हामी यही समस्या समाधाका निम्ति भनेर प्रतिष्ठानका रजिस्ट्रारको नेतृत्वमा समिति बनाएका छौं। समितिको सदस्यमा डा. पुजन कुमार रोकाया र कार्यकारी परिषद् सदस्य डा. विवेक पुन हुनुहुन्छ।’

यता प्रतिष्ठानका रजिस्ट्रार महतले समस्या समाधानका लागि समिति बने पनि व्यक्तिगत रुपमा उठेका सबै प्रश्नको जवाफ दिन तयार रहेको बताए। उनले भने, ‘हामीले प्रतिष्ठानमा खुलेआम दलीय राजनीति गर्ने, प्रतिष्ठानको विरुद्ध सामाजिक संजालमा असामाजिक रुपमा प्रस्तुत हुने कर्मचारीलाई स्पष्टीकरण सोध्दा सिंगो पार्टी प्रतिष्ठान विरुद्ध लाग्नु जुम्ला र संस्थाका लागि राम्रो कुरा होइन।’

कुरा कर्मचारीको नभई प्रतिष्ठानको व्यवस्थापन र अनिमितताको भएको बताउँदै तरुण दल जुम्लाका अध्यक्ष बुढथापाले उपकुलपति जवाफदेही हुनुको साटो भागेर जानू गैरजिम्मेवारीपन भएको बताए।

बाटोमा भएका उपकुलपतिसँग कनका खबरको फोन सम्पर्क नभएपछि प्रतिष्ठानलाई सोध्दा उपकुलपति बजेट रकमान्तरको महत्त्वपूर्ण कामले जिल्ला बाहिर गएको रजिस्ट्रार मतको भनाइ छ। उनले थपे, ‘९० प्रतिशत भन्दा बढी माग प्रशासनसँग सम्बन्धित भएको हुनाले म यतै बसेर आन्दोलनरथ पक्षसँग बसेर छलफल गर्ने तयारी गरेको छु।’

यसैबीच प्रतिष्ठानसँग नेविसंघ र तरुण दलको विवाद उत्कर्षमा पुग्न नदिन र समस्या समाधान गर्न भनि जिल्ला स्थित राजनीतिक दलका प्रतिनिधि सम्मिलित समस्या समाधान कार्यदल गठन भएको छ। समितिको संयोजकमा जिल्ला समन्वय समितिका प्रमुख गौरी नन्द आचार्य रहेका छन्।

नौ सदस्सीय कार्यदलमा नेपाली काँग्रेसको तर्फबाट उपसभापति दिपक शाही, नेकपा एमालेको तर्फबाट प्रदेश सदस्य भीमबहादुर थापा, माओवादी केन्द्रको तर्फबाट युवानेता मनोज बुढाथोकी र जसपाको तर्फबाट जिल्ला अध्यक्ष अमितकुमार शाही, राप्रपाको तर्फबाट नेता मनसुर सुनार, एकिकृत समाजवादीबाट जिल्ला अध्यक्ष दयादत्त हमाल, नेकपाबाट विर्षबहादुर शाही सदस्यमा रहेका छन्।

कार्यदलले प्रतिष्ठानको विषयमा उठेका र देखिएका समस्या सात दिनभित्र समाधान गर्ने निर्णय गरेको र आगामी दिनमा आउने समस्या सर्वदलीय संयन्त्रमा राखी साँझा धारणा बनाई अगाडी बढ्ने निर्णय भएको प्रमुख आचार्यले बताए।

यसैबीच मंगलबार साँझ पाँच बजे कार्यदलले संयुक्त बैठकको आयोजना गर्दैछ भने नेपाली काँग्रेस कार्यालयमा नेविसंघ र तरुण दलको बैठक बसिरहेको स्रोतले बताएको छ।

यस्ता छन् नेविसंघ र तरुण दलले ध्यानाकर्षण पत्र मार्फत राखेका मागहरु