जुम्लाको सिंजा गाउँपालिका-३ धितालिहीमा तीन दिनसम्म संचालित निःशुल्क स्वास्थ्य शिविर सम्पन्न भएको छ। शिविरबाट २३ सय बढी स्थानीय लाभान्वित भएको सिंजा गाउँपालिकाले जनाएको छ।

शिविरमा आउनेलाई सामान्य चिकित्सा, जनरल सर्जरी, स्त्री तथा प्रसूति रोग, मुटुरोग, दन्तरोग, हाडजोर्नी, आँखा, नाक कान घाँटीको लगायतका समस्याको स्वास्थ्य जाँच गरिएको सिंजा गाउँपालिकाका अध्यक्ष पूर्ण धितालले बताए।

‘स्थानीय स्तरमै विशेषज्ञ चिकित्सक सेवा उपलब्ध गर्ने उद्देश्य शिविर सञ्चालन गरियो,’ उनले भने, ‘सिंजा भेगमा तीन वटा पालिका रहेका छन्। शिविरबाट हिमा, कनकासुन्दरी र सिंजा गाउँपालिकाका स्थानीयवासीले सेवा लिनु पाउँदा हामी अत्यन्तै खुसी छौं।’

शिविर गाउँपालिकाको सहजीकरण तथा ब्रिटिस गोर्खाज् नेपाल कादुरीको आयोजनामा वैशाख १५ देखि १८ गतेसम्म निःशुल्क स्वास्थ्य शिविरबाट संचालन भएको थियोे। शिविरबाट एक हजार चार सय ४८ जना महिला र नौ सय एक जना पुरुष लाभान्वित भएको सिंजा गाउँपालिका स्वास्थ्य शाखा संयोजक ललित रोकायाले बताए।

जसमा १०१ जना महिला र ८६ जना पुरुष गरी १८७ जनाले प्रयोगशाला सेवा लिएका छन्। शिविरमा ५१३ जना महिलाले पाठेघर चेकजाँच गरेका छन्। ७ जना महिलाको पाठेघरमा रिंग राखिएको छ भने ५५ जना महिलाले भिआइए सेवा लिएका छन्।

त्यस्तै १६५ जना नागरिकले मुटु जाँच सेवा लिएका छन्। ७३६ जना महिला र एक हजार ३२६ जना पुरुष गरी दुई हजार ६२ जनाले शिविरमा बहिरङ्ग सेवा लिएका छन्। एक हजार ५५८ जनाले शिविरमा आँखा चेकजाँच गराएका छन्। जसमध्ये २९ जना पुरुष र ३४ जना महिलाको आँखा शल्यक्रिया गरिएको छ।

त्यसैगरी ४११ जना पुरुष र ८६९ जना महिला गरी एक हजार २८० जनालाई चस्मा समेत वितरण गरिएको छ। २२८ जना पुरुष र ३८८ जना महिलाले डेन्टल सेवा लिएका छन्। यस मध्ये ५३४ जनाको दाँत निकालिएको छ।

गाउँमै सबैखाले रोगको उपचार गर्ने बृहत् शिविर सञ्चालन भएपछि सिंजाका स्थानीयले राहत महशुस गरेको गाउँपालिकाकी उपाध्यक्ष सितली रोकायाले बताइन्। उनले भनिन्, ‘त्यही उपचार गर्न जुम्ला अस्पताल हुँदै सुर्खेत नेपालगन्ज काठमाडौँ जाँदा महँगो खर्च हुनबाट जोगिएको र घरआँगनमै उपचार पाएको हुनाले सिंजाबासी खुसी छन्।’

दुर्गम भेगका नागरिक समयमै अस्पताल जान नसकि रोग पालेरै बसेको बेला स्वास्थ्य शिविर कोसेढुङ्गा भएको सिंजा गाउँपालिका प्रमुख प्रशासकीय अधिकृत पवित्रा शाहीले बताइन्।

‘विशेषगरी पाठेघर समस्या भएका ग्रामीण भेगका महिला खुल्दैनन्,’ उनले भनिन्, ‘गाउँघरमै यस्ता घुम्ती शिविरले सेवाग्राहीलाई सहज हुने गर्दछ।’

सिंजा गाउँपालिकाले बेलाबेलामा एकीकृत घुम्ती शिविर सिंजा सञ्चालन गर्ने गरेको र यसबाट धेरै सेवाग्राही लाभान्वित भइरहेको संयोजक रोकायाले कनका खबरलाई जानकारी दिए।