कर्णाली स्वास्थ्य विज्ञान प्रतिष्ठान जुम्लाका एसोसिएट प्रोफेसर एवं आकस्मिक कक्ष इन्चार्ज डा. तुलाकृष्ण गुप्ता पछिल्लो एक महिनादेखि मोटरसाइकलको ठक्करले मृत्यु भएकी आफ्नी आमाको न्यायका लागि भौतारिरहेका छन्।

उनकी आमा जयमाला गुप्तको गत जेठ ९ गते राति मोटरसाइकलले ठक्कर दिँदा गम्भीर घाइते भई उपचारका क्रममा अस्पतालमा मृत्यु भएको थियोे।

सप्तरीको कञ्चनरूप नगरपालिका–८ मा बसोबास रहेकी आफ्नी आमाको न्यायका लागि लडेको एक महिना बितिसक्दा पनि दोसी पत्ता नलागेको डा. गुप्ताको भनाइ छ।

उनले दैनिक जसो इलाका प्रहरी कार्यालय कञ्चनपुर, जिल्ला प्रहरी कार्यालय र यहाँका जनप्रतिनिधि एवं नेताका दैलो चहार्दैमा समय बितिरहेको बताएका छन्। उनले भने, ‘अहिलेसम्म पनि आमालाई ठक्कर दिने मोटरसाइकल र त्यसका चालकको पहिचान हुन सकेको छैन।’

इलाका प्रहरी कार्यालय कञ्चनपुरका प्रहरीले आवश्यक सहयोग नगर्दा थप मर्कामा परेको उनको भनाइ छ।

‘अनुसन्धानका लागि गृहमन्त्री रवि लामिछानेदेखि हेल्लो सरकारसम्म गुहारें,’ उनले भने, ‘उच्च पदस्थ प्रशासनिक अधिकारीलाई न्याय दिलाइदिन याचना गरें। तर अझै पनि प्रहरीले ठक्कर दिने मोटरसाइकल र चालकको खोजीमा सक्रियता देखाएको छैन।’

डा. गुप्ताका अनुसार कञ्चनरूप–८ मै रहेको मन्दिरमा पूजा गरी फर्किने क्रममा गत जेठ ८ राती साढे ८ बजे दक्षिणबाट उत्तरतर्फ गइरहेको नम्बर खुल्न नसकेको मोटरसाइकलले कञ्चनपुर–फतेपुर सडक खण्डमा ठक्कर दिएको थियो। ठक्करबाट ‘सिभियर ब्रेन इन्जुरी’ भई अस्पताल भर्ना गरिएकी जयमालाको उपचारका क्रममा गत जेठ १५ मा विराटनगरमा मृत्यु भएको थियो।

‘आमा दुर्घटनामा पर्नुभएको खबर पाएपछि तत्कालै जुम्लाबाट आएर एक हप्तासम्म उपचार गरे पनि आमालाई जोगाउन सकिएन,’ डा. गुप्ताले भने, ‘धर्म परम्परा अनुसार १३ दिनको किरिया बसेदेखि आज एक महिनासम्म ठक्कर दिने सवारी साधनको खोजीका लागि स्थानीय प्रहरी कार्यालय धाएको धायै छु, प्रधान कार्यालयदेखि गृहमन्त्रीसम्म गुहारेको छु तर पनि दोषी पत्ता लागेको छैन।’