अमेरिका नेपाल मेडिकल फाउण्डेसनको एक करोड २३ लाख सहयोगमा कर्णाली स्वास्थ्य विज्ञान प्रतिष्ठानमा ब्लड बैंक स्थापना गरिने भएको छ।
ब्लड बैंक नहुँदा झण्डै १३ वर्ष समस्या झेलेको कर्णाली स्वास्थ्य विज्ञान प्रतिष्ठानमा उपचार गर्न आउने बिरामीलाई सहज हुने भएको हो।
सरकारले प्रतिष्ठानलाई नियमित रुपमा उपलब्ध गराउँदै आएको बजेट घटाएपछि नयाँ उपकरण र पुर्वाधार निर्माणमा प्रतिष्ठानलाई असहज भएको थियोे। अत्यावश्यक भएपनि बजेट अभावले ब्लड बैंक स्थापना हुन नसकेको प्रतिष्ठानका उपकुलपति डा. मंगल रावलले बताए।
‘प्रतिष्ठानमा ब्लड बैंक स्थापनाका लागि सहयोग प्राप्त हुने निश्चित भएको छ,’ उनले भने, ‘अमेरिकामा कार्यरत सम्पूर्ण चिकित्सा समुदाय कर्णाली स्वास्थ्य बिज्ञान प्रतिष्ठानलाई हरेक तवरबाट सहयोग गर्न उत्सुक हुनुहुन्छ।’
अमेरिका नेपाल मेडिकल फाउण्डेसनले केही समय अघि सिकागो सहरमा आयोजना गरेको तीन दिवसीय सभामा दुर्गमको स्वास्थ्य सेवाका चुनौति र संभावनाका विषयमा उपकुलपति रावलले प्रस्तुतिकरण गरेका थिए।
कर्णालीको सम्भावना र समस्याहरु दर्शाएपछि फाउण्डेसनले सवाँ करोड लगानीमा ब्लड बैंक स्थापनाको ग्यारेन्टी गरेको उपकुलपति डा. रावलको भनाई छ।
फाउण्डेसनको २८ औं सभाका अबसरमा ब्लड बैंक स्थापना गर्न सहयोग रकम हस्तान्तरण गरिएको हो। कर्णाली स्वास्थ्य विज्ञान प्रतिष्ठान र फाउण्डेसनबीच भविश्यमा हुन सक्ने सहकार्यका विषयमा पनि छलफल भएको डा.रावलले जानकारी दिए।
फाउण्डेसनले नेपालको स्वास्थ्य क्षेत्र सुधारमा सहयोग र सहकार्य गर्दै आइरहेको छ। फाउन्डेसनले कर्णालीसँग लामो समय सहकार्य खोजेको र त्यो प्रतिष्ठानका लागि फलदायी हुने उपकुलपति डा. रावलको भनाइ छ।
फाउण्डेसनको सभामा भाग लिन चिकित्सा विज्ञान राष्टिय प्रतिष्ठान वीर अस्पतालका उपकुलपति प्रा.डा भुपेन्द्र बस्नेत, नेपाल चिकित्सक संघका अध्यक्ष डा. अनिल कार्की, नेपाल स्वास्थ्य अनुसन्धान परिषद्का कार्यकारी सदस्य सचिव डा. प्रमोद जोशी लगायत नेपाली चिकित्सकहरु समेत सहभागी भएका छन्।
महेश नेपाली । २०८१ जेष्ठ २९