जुम्लामा जेष्ठ १४, १५, र १६ गते सम्म गणतन्त्र दिवस मनाइने भएको छ। विभिन्न कार्यक्रम गरी ३ दिन गणतन्त्र दिवस मनाइने भएकाे हो। तीन दिन सम्म मनाईने दिवस अन्तर्गत गरिने विभिन्न क्रियाकलापका लागि जिल्लास्तरमा ६ वटा निर्णय भएकाे प्रमुख जिल्ला अधिकारी जयकुमार घिमिरेले बताए।

उनका अनुसार जिल्ला समन्वय समितिका प्रमुख गौरीनन्द आचार्यको संयोजकत्वमा चन्दननाथ नगरपालिकाका प्रमुख, जिल्ला स्थित सरकारी तथा गैरसरकारी कार्यालय तथा सुरक्षा निकायका प्रमुख, राजनीतिक दल, पत्रकार, नागरिक समाज समेत रहने गरी जिल्लास्तरीय समिति गठन गर्ने निर्णय भएकाे छ।

जेष्ठ १४ १५ र १६ गते गरि तीन दिनसम्म जिल्ला स्थित सबै सरकारी निकाय, प्रतिष्ठान तथा संघ संस्थाका कार्यालयहरूको छत, वरण्डा र परिसरमा निर्धारित साइजका राष्ट्रिय झण्डा मर्यादापूर्वक राखी सजाउने र साझ सम्पूर्ण कार्यालयहरू र जिल्ला वासीका घर-घरमा समेत दीप प्रज्वलन गर्ने गराउने,तेस्राे जेष्ठ १४ गते बिहान सात बजे जिल्ला प्रशासन कार्यालयको परिसर लगायतका स्थानहरूमा डिभिजन वन कार्यालयको सहयोगमा वृक्षारोपण कार्यक्रम आयोजना गर्ने र साँझ स्थानीय कृष्ण मन्दिर परिसरमा भेला भई दिप प्रज्वलन गर्ने निर्णय भएकाे प्रमुख जिल्ला अधिकारी जयकुमार घिमिरेले जानकारी दिए।

‘जेष्ठ १५ गते विहान सा बजे जिल्ला प्रशासन कार्यालय अगाडि भेला भई प्रभात फेरीसहित बजार परिक्रमा गर्ने, जेष्ठ १६ गते विहान सात बजे बजार सरसफाई गर्ने र आठ बजे स्थानीय कृष्ण मन्दिर अगाडि भेला भई वातावरण संरक्षण सम्बन्धी जनचेतनामूलक सडक नाटक चन्दननाथ नगरपालिका, जुम्लाको आयोजनामा संचालन गर्ने र यसमा डिभिजन वन कार्यालय, भू तथा जलाधार व्यवस्थापन कार्यालय, वनस्पति अनुसंधान केन्द्र तथा नेपाल रेडक्रस सोसाइटी जिल्ला शाखाले आवश्यक सहयोग तथा सहजीकरण गर्ने छ,’ उनले भने।

त्यस्तै दिवस अवधिभर जिल्लामा रहेका सार्वजनिक महत्त्वका स्थानहरू, समाजिक-सांस्कृतिक तथा ऐतिहासिक पुरातात्विक महत्वका सम्पदास्थलहरूको सरसफाई सहित परिसर एवं संभावय स्थलहरूमा निर्वाचित जनप्रतिनिधि, स्थानीय समाजसेवी, राष्ट्रसेवक कर्मचारी एवं सुरक्षाकर्मीहरू समेतको सामुहिक सहभागितामा सांझ दीप प्रज्वलन गर्ने निर्णय गरिएकाे हो।

उक्त निर्णय अनुरुप सोमबार वृक्षारोपण कार्यक्रम सम्पन्न भएको छ भने साँझ दिप कृष्ण मन्दिर परिसरमा दिप प्रज्वलन कार्यक्रम हुने प्रमुख जिल्ला अधिकारी जयकुमार घिमिरेले जानकारी दिएका छन्।