जुम्ला- स्वावलम्बन लघुवित्त संस्था लिमिटेडले सामाजिक उत्तरदायित्व कार्यक्रमअन्तर्गत चन्दनाथ भैरव नाथ मन्दिरमा भौतिक सामग्री हस्तान्तरण गरेको छ। आज आयोजित एक विशेष कार्यक्रममा जुता राख्ने र्याक दुईवटा र फलामका दुईवटा बस्ने बेञ्च प्रदान गरिएको हो। करिब ५२ हजार रुपैयाँ बराबरको सामग्री मन्दिर व्यवस्थापन समितिलाई हस्तान्तरण गरिएको संस्थाले जनाएको छ ।

कार्यक्रममा चन्दनाथ भैरव नाथ गुठिका अध्यक्ष अम्बर बहादुर थापा, चन्दनाथ नगरपालिका वडा नं. ५ का अध्यक्ष बिर्ख बहादुर कार्की, समन्वय समिति सदस्य नरबिर सुनार, स्वावलम्बन लघुवित्तका संचालक समिति शदश्य उमा जोशी बोहोरा,लघुवित्तका प्रमुख कार्यकारी अधिकृत नरेन्द्र सिंह बिष्ट क्लस्टर प्रमुख चन्द्र बहादुर थापा,कर्मचारी तथा समूह सदस्यहरूको उपस्थिति रहेको थियो।

गुठिका अध्यक्ष थापाले यस्तो सानो प्रयासले धार्मिक स्थलहरूको व्यवस्थापनमा महत्वपूर्ण योगदान पुग्ने विश्वास व्यक्त गरे । साथै, स्वावलम्बन लघुवित्तका प्रमुख कार्यकारी अधिकृत बिष्टले सामाजिक उत्तरदायित्व अन्तर्गत समुदायलाई आवश्यक भौतिक संरचना सहयोग गर्दै आइरहेको बताउँदै आगामी दिनमा पनि यस्ता कार्यलाई निरन्तरता दिने प्रतिबद्धता व्यक्त गरे।

यो सहयोगले मन्दिर आउने भक्तजनहरूलाई सुविधा पुर्‍याउने विश्वास गरिएको छ। स्थानीय तह तथा अन्य संघसंस्थाको सहभागितामा धार्मिक तथा सांस्कृतिक सम्पदाको संरक्षणलाई प्रवर्द्धन गर्न यस्ता सहयोग कार्यक्रम प्रभावकारी हुने स्थानीयबासीको भनाइ छ।