जुम्ला। प्रत्यक वर्ष फागुन २४ अर्थात् मार्च ८ मा मनाईने अन्तराष्ट्रिय नारी दिवस यसपाली पनि जुम्लामा भब्यताका साथ मनाईएको छ। “सबै महिला तथा बालिकाकाे लागि अधिकार समानता र सशक्तीकरण” भन्ने नारासहित दिवस सुसम्पन्न भएको छ

सदाझैं जुम्लामा यसपाली पनि बिभिन्न सांस्कृतिक कार्यक्रमहरू गरिएको छ। जुम्लाको स्थानिय मौलिकता झल्काउने बाजाहरूको प्रयोग गरि देउडा सांस्कृतिकलाई प्रथामिकता दिई नारी दिवसलाई थप सान्दर्भिक बनाईएको हो।

प्रतिनिधि सभा सांसद बिनिता कठायत, प्रमुख जिल्ला अधिकारी राम बहादुर शाही लगायतको टोली उपस्थित कार्यक्रममा स्थानिय महिलाहरुले देउडा प्रस्तुत गरेका छन्।

महिलाका पिडालाई हरेक तहले गम्भीर भई लाग्नु पर्नेमा सांसद कठायतले जोड दिएकी छन्। महिला कुनै पनि कुरामा कमजोर नभएको उनको भनाई छ।

नारी सर्वशक्तिमान रहेको प्रमुख जिल्ला अधिकारी शाहीको बुझाई छ। तुलनात्मक रुपमा हाल नारीले पहिचान पाउँदै गरेको शाहीले बताए।

चन्दननाथ नगरपालिका महिला शाखाको सहयोग तथा समन्वय र जिल्ला स्थित मानव अधिकार रक्षक सञ्जाल र जुम्ला जिल्ला स्थित अन्य गैर सरकारी संस्था द्वारा आयोजित उक्त कार्यक्रममा स्थानियको बाक्लो उपस्थिति रहेको थियो।

मानव अधिकारका क्षेत्रमा पछिल्लो समय उक्त सञ्जाल निकै सक्रिय रहेको छ । मानव कुनै पनि अधिकार बाट बञ्चित हुनु नहुने सोहि सञ्जालको मूख्य उदेश्य रहेको छ।