जुम्ला – चन्दननाथ नगरपालिकामा ‘कृषि खाद्य प्रणालीको लागि नवीकरणीय ऊर्जा’ (RERAS) अन्तर्गत स्थानीय कृषि उपजमा आधारित दिवा खाजा कार्यक्रमको सुरुवात गरिएको छ। चन्दननाथ नगरपालिकाको हलमा सम्पन्न भएको पालिका स्तरीय सुरुवाती तथा अभिमुखीकरण बैठकमा नगर प्रमुख राजु सिंह कठायत, उप-प्रमुख रामदेखि खड्का लगायत सरोकारवाला निकायका प्रतिनिधिहरू उपस्थित थिए।

कार्यक्रमका क्रममा विश्व खाद्य संघका जुम्ला संयोजक चक्र जिसीले स्थानीय कृषि उपजमा आधारित दिवा खाजा कार्यक्रमको कार्ययोजना प्रस्तुत गरे। फाल्गुण २०८१ देखि माघ २०८२ सम्म सञ्चालन हुने कार्यक्रमलाई संयुक्त राष्ट्रसंघीय विकास कार्यक्रम (UNDP) तथा नर्वेजियन सरकारले आर्थिक सहयोग गर्नेछ। कुल ४० लाख बजेटमा सञ्चालन गरिने यस कार्यक्रमलाई चन्दननाथ नगरपालिकाले कार्यान्वयन गर्नेछ। स्थानीय कृषक समूह, सहकारी संस्थाहरू, सामुदायिक विद्यालय र विद्यार्थीहरू यस कार्यक्रमका लाभग्राही रहने छन्।

नगर प्रमुख कठायतले कार्यक्रमलाई प्रभावकारी बनाउन नगरपालिकाको पूर्ण सहयोग रहने बताउँदै यसले बालबालिकालाई पोषणयुक्त भोजन उपलब्ध गराउने र कुपोषण हटाउने विश्वास व्यक्त गरे। उनले कुपोषणकै कारण बालबालिकामा देखिने कमजोरी हटाउन पोषणयुक्त भोजन आवश्यक रहेको उल्लेख गर्दै, विद्यालयस्तरमा दिवा खाजा कार्यक्रम लागू गर्नु टेवा पुर्‍याउने बताए।

यस कार्यक्रमलाई सफल बनाउन शिक्षा, युवा तथा खेलकुद शाखाले नेतृत्व गर्नेछ भने स्वास्थ्य, कृषि, सहकारी, महिला तथा बालबालिका शाखाको सहकार्य रहनेछ। कार्यक्रमअन्तर्गत विद्यालयका विद्यार्थीलाई स्थानीय कृषि उत्पादनमा आधारित भोजन उपलब्ध गराइनेछ भने किसान, कृषक समूह र कृषि सहकारीलाई संस्थागत रूपमा सबल बनाइने छ। साथै, व्यवहार परिवर्तनका लागि सञ्चारसम्बन्धी गतिविधिहरू सञ्चालन गरिनेछन्।

चन्दननाथ नगरपालिकाका १९ वटा सामुदायिक विद्यालयमा लागू भएको यो कार्यक्रमले विद्यार्थीको नियमित विद्यालय उपस्थितिमा वृद्धि गर्नुका साथै उनीहरूको स्वास्थ्य सुधारमा महत्वपूर्ण भूमिका खेल्ने अपेक्षा गरिएको छ।