कर्णाली  स्वास्थ्य विज्ञान प्रतिष्ठानमा आवश्यक एक्सरे फिल्म अभावले गर्दा बिरामीहरू उपचार पाउनबाट वञ्चित भइरहेका छन्। एक्सरे जाँच गर्न आवश्यक फिल्म नभएका कारण अस्पतालमा आउने बिरामीहरू, विशेष गरी टाढा–टाढाबाट आएका बिरामीहरूले जाँच र उपचारको लाभ लिन सकेका छैनन्।

अस्पतालमा एक्सरे फिल्म नहुँदा, बिरामीहरूको एक्सरे मोबाइलबाट खिचेर काम चलाउनुपर्ने बाध्यता छ। तर यसले बिरामीहरूको समस्यालाई समाधान गर्न सकेको छैन, किनकि मोबाइलबाट खिचिएका तस्वीरहरू औपचारिक एक्सरेको तुलनामा अस्पष्ट र कम प्रभावकारी हुने भएकाले, बिरामीहरूको रोग निदान र उपचारमा समस्या उत्पन्न भएको छ।

अस्पताल व्यवस्थापनको बेवास्ता र सामग्री अभाव नै यस समस्याको मूल कारण भएको बिरामीहरूको गुनासो छ। एक्सरे विभागका प्रमुख मिलन तिमल्सिनाका अनुसार अस्पताल व्यवस्थापनलाई समयमै एक्सरे फिल्मको अभावबारे जानकारी गराइए पनि व्यवस्थापनले यसलाई बेवास्ता गरेको आरोप लगाए। प्रमुख तिमल्सिनाले भने, “अति आवश्यक सामग्रीको समयमै खरिद नगर्दा बिरामीहरूले यस्तो दुःख झेल्नुपरेको हो। बिरामीहरूको स्वास्थ्यमा यस्तो लापरबाही गर्नु अनैतिक मात्र होइन, गैरजिम्मेवारी पनि हो।”

पातारासीबाट आएका एक बिरामीले सामान्य स्वास्थ्य जाँचको सुविधा नै नपाउँदा गहिरो दुःख व्यक्त गरे। उनले भने, “यहाँ आएपछि सामान्य उपचार सेवा पनि नपाउँदा निकै दुःख लागेको छ। हामी जस्तै थुप्रै बिरामीहरू लामो दूरी तय गरेर उपचारको आशामा यहाँ आइपुग्छौं, तर सामान्य जाँचको सुविधा समेत पाउँदैनौं।”

बिरामीहरूले व्यवस्थापनलाई गम्भीर हुन र स्वास्थ्य सेवामा ध्यान दिनुपर्ने आवश्यकता औंल्याएका छन्। उनीहरूले एक्सरे जाँचमा बाधा पुर्याउने यस्ता समस्याको समाधान समयमै गर्न र सामाग्री अभावको पुनरावृत्ति नहोस् भन्नेतर्फ अस्पतालले उचित व्यवस्था गर्नुपर्ने माग राखेका छन्।

यो घटनाले अस्पतालको व्यवस्थापन प्रणाली सुधार्न र स्वास्थ्य सेवा उपलब्ध गराउन जिम्मेवार ठान्नुपर्ने दबाबसमेत बढाएको छ। आवश्यक स्वास्थ्य सामाग्रीमा लापरबाही हुँदा बिरामीको उपचारमा गम्भीर समस्या आउने भएकोले, प्रतिष्ठानलाई यस्ता मुद्दाहरूमा गम्भीरता लिने र आवश्यक कदम चाल्न विशेषज्ञहरूले सुझाव दिएका छन्।