१.
कुटानी ढिकीमा थियाे, पेलानी काेलमा थियाे
खनजाेत पर्ममा थियाे, व्यवहार सँगाेलमा थियाे
बिजुली र डिजिटल युग आउनुभन्दा पहिलेपहिले
उत्सव,संस्कार र पर्वमा चमक त मैन्टाेलमा थियाे l
– नवराज न्यौपाने/ काठमाडौं

२.
थियो पुर्खाको चिनो, जोगाउन नसकेर खेर गयो
दिन त योगदान आफ्नो समयलाई दिएर गयो
दह्रीलो आँट गतिलो पाठ बनेर एउटा इतिहास
हामीलाई उज्यालो बनायो तर आफू निभेर गयो l**
-जिज्ञासु पौडेल तिलक/बुटवल

३.
रातिमा रमाइलो गरिन्थ्यो खैजडी भजन टोलटोलमा हुन्थ्यो
चामल, च्युरा ढिकिमा कुटिन्थ्यो तेल पेल्ने कोलमा हुन्थ्यो
हामी ढुङ्गे युगको भयौ तिम्रो जमाना त बिज्ञानको आयो छोरा
हाम्रो पालामा उज्यालो दियालो, टुकि र मैनटोलमा हुन्थ्यो l
– शिबहरि खतिवडा

४.
सलाम छ पुर्खाको कला कौशल अदम्य थियो
आवश्यकता पूर्तिमा ज्ञान् विवेक अगण्य थियो
प्रविधिले खोक्रो पारेको अहिलेको सामाजभन्दा,
एकादेशको कथा लाग्ने त्यही समय अनन्य थियो ।
-गोमा नयन/इटहरी

५.
फेरिनु पर्छ हर चीजले परिवर्तनको लयसँगै
पुरानाले जो अस्ताउनु पर्छ नयाँको उदयसँगै
जति छन् सब नश्वर, अनश्वर छैनन् केही यहाँ
विश्वज्योति घामले पनि निभ्नु पर्छ समयसँगै l
– क्रीश गुरुङ/लमजुङ

काठमाडौंमा संचालित ‘फोटोमा मुक्तक प्रतियोगिता’को एक सय १७२औं शृङ्खला सम्पन्न भएको छ। फोटोमा मुक्तक प्रतियोगिता कार्यक्रम काठमाडौंका सुनिल अधिकारीद्वारा परिकल्पना गरिएको नेपाली साहित्यको मुक्तक विधालाई उन्नयन र प्रवर्द्धन गर्नको लागि सुरुवात गरिएको कार्यक्रम हो।

प्रत्येक शृङ्खलामा ५ जना मुक्तककारलाई विजेता घोषणा गर्ने गरिन्छ। तिनै विजयी पाँच जना मुक्तककारका ५ वटा मुक्तकहरु फोटोमा मुक्तक प्रतियोगिताको एक सय ६४ औं शृङ्खलाबाट कनका खबरको अनलाइन पत्रिकाबाट छपाइँदै आइएको छ।