तस्बिर : कनका खबर
जुम्ला कारागारमा रहेका कैदीबन्दी लक्षित गरेर स्वास्थ्य शिविरको आयोजना गरिएको छ।
जिल्ला प्रहरी कार्यालय जुम्लाको आयोजना र कर्णाली स्वास्थ्य बिज्ञान प्रतिष्ठान जुम्लाको सहयोगमा कारागारमा रहेका कैदीबन्दीहरूका लागि निःशुल्क स्वास्थ्य शिविर सञ्चालन गरिएको हो।
कारागार जुम्लामा हाल विभिन्न प्रकृतिका कैदीबन्दी, १२० जना मध्ये कैदीबन्दीको स्वास्थ्य परिक्षण गरिएको डीएसपी क्षेदीलाल कामतीले बताए।
कैदीबन्दीहरुको स्वास्थ्य परिक्षणका लागि कर्णाली स्वास्थ्य विज्ञान प्रतिष्ठान जुम्लाका डाक्टर शुभाङ्क प्याकुरेल नेतृत्वको टिम खटिएको थियोे।
जिल्ला समन्वय समिति जुम्लाका प्रमुख गौरीनन्द आचार्यले सुधार गृहका रुपमा राज्यले कारागारलाई विकास गर्न खोजेको बताए।
‘विभिन्न कारणले जेल जीवन बिताई रहेकाहरुको लागि सीप विकास तालिम संचालनको गर्न समन्वय र सहजिकरण गर्नेछौं,’ उनले भने।
प्रमुख जिल्ला अधिकारी जयकुमार घिमिरेले बेला बेला स्वास्थ्य परिक्षण गरेमा अचानक हुने मृत्युबाट बच्न सकिने बताए।
उनले भने, ‘खानिपन र आहार विहारमा ध्यान दिन सकेमा स्वास्थ्यमा आउने समस्याबाट छुटकारा पाउन सकिन्छ।’
कैदीबन्दीहरुको स्वास्थ्य सेवाको पहुँचमा वृद्धि गर्न र उनीहरु रहेकै स्थानबाट आधारभुत स्वास्थ्य सेवा प्रदान गर्न शिविर सञ्चालन गरिएको डीएसपी कामतीको भनाइ छ।
कर्णाली स्वास्थ्य विज्ञान प्रतिष्ठानका डाक्टर राकेश कुमार यादवले कारागारमा रहेका १ सय २० जनालाई स्वास्थ्य जाँच गरिएको बताए।
उनका अनुसार उनीहरुमा ग्याष्टिक, मानसिक समस्या, श्वासप्रश्वास र एलर्जीको समस्या देखिएको उहाँको भनाइ छ।
कनका खबर । २०८१ भाद्र २