तस्बिर : कनका खबर
जुम्लाको चन्दननाथ नगरपालिकाले नियुक्त गरेका नगर प्रहरीलाई तालिम दिन सुरु गरेको छ।
मंगलबार बिहान एक ओैपचारिक कार्यक्रम गरि नगर प्रहरीलाई तालिम दिने कामको जिम्मा सशस्त्र प्रहरीलाई दिएको चन्दननाथ नगरपालिकाकी उपमेयर रामदेवी खड्काले बताइन्।
उनका अनुसार सशस्त्र प्रहरीले नगर प्रहरीलाई एक महिनासम्म लगातार तालिम दिनेछ।
‘तालिममा नगर प्रहरीलाई नगरको शान्ति सुरक्षा, नगर व्यवस्थापन, बजार व्यवस्थापन लगायतका कुरा तालिममा सिकाइनेछ,’ उनले भनिन्।
तालिम प्राप्त नगर प्रहरीले नगरकाे शान्ति सुरक्षालाई मजबुद बनाउने अपेक्षा गरिएकाे चन्दननाथ नगरपालिकाका निमित्त कार्यकारी प्रमुख पृथ्वीनाथ योगीले बताए।
‘नगरका कयौं कुरा व्यवस्थापन गर्ने मामलामा नगर प्रहरीको अभाव खड्किएको हुँदा नगर प्रहरी नियुक्त गरिएको हो,’ उनले भने।
चन्दननाथ नगरपालिकाले खोलेको १५ जनाको नगर प्रहरीको विज्ञापनमा शारीरिक तन्दुरुस्ती र लिखितमा २२ जवान र एक असही गरि २३ जनाको नाम निस्किएको छ।
एक महिना दिनको तालिम पछि नगरमा शान्ति सुरक्षाको जिम्मेवारी नगर प्रहरीले लिने उपमेयर खड्काको भनाई छ।
कनका खबर । २०८१ साउन १