सारा दु:ख, अभाव नियालेर चेत जगायो भने
कोहिको भर नपरी, रगत-पसिना बगायो भने
एउटा दृष्टान्त आँखै अघि ठडिएको छ हेर्नुस त,
के पो गर्न सकिन्न र यहाँ दिमाग लगायो भने ।
– लक्ष्मी स्मृति/विराटनगर

कहिले ढुङ्गाहरू भेला गरी मन्दिर र धरोहर बनाउँछ
भावनालाई मूर्तरूप दिँदै फलैँचा पाटी सुन्दर बनाउँछ
निर्दोष बालापनमा फिरफिरे, चङ्गा, भाँडाकुटी बनाएझैँ,
तिनै सृजनशील शिल्पी हातले बोतलको घर बनाउँछ ।
-भूपाल अधिकारी/विराटनगर

चाहिँदैन विज्ञान चाहिँदैन गणित व्यवहारले पाकेपछि
समस्याको हल अवस्य निस्कनेछ भोगाइले थाकेपछि
बेकम्मा ठानिएको सामग्री पनि उपयोगी सावित हुन्छ
लक्ष लिएर सफलता हासिलगर्न अन्तर्मनले ताकेपछि l
– प्रमोद भट्टराई ‘प्रतीक’/भक्तपुर

सीप हुनेले कसिङर सिँगारेर पनि पैसा कमाउन सक्छन्
मनका तकलिफ भुलेर खुसीले संसारमा रमाउन सक्छन्
भुइँ मान्छेले पनि आफ्नो क्षमताको उपयोग गर्न सके भने,
नभमा डुल्न सक्छन्, सागरको मोती पनि समाउन सक्छन् ।
– ऋषिराम भुसाल/काठमाडौं

बुझ्नसके स्वर्णसिला नसके बगरको पत्थर हुने गर्छ
सीप र जागर चले बिघ्नबाधा भित्र अवसर हुने गर्छ
केवल गाह्रो पर्छ यहाँ पहिचान गर्न हिरा र पत्थरको
पहिचान गर्नसके गनाउने फोहोर नि मोहर हुने गर्छ l
– राम न्यौपाने/ कैलाली

काठमाडौंमा संचालित ‘फोटोमा मुक्तक प्रतियोगिता’को एक सय १७७ औं शृङ्खला सम्पन्न भएको छ। फोटोमा मुक्तक प्रतियोगिता कार्यक्रम काठमाडौंका सुनिल अधिकारीद्वारा परिकल्पना गरिएको नेपाली साहित्यको मुक्तक विधालाई उन्नयन र प्रवर्द्धन गर्नको लागि सुरुवात गरिएको कार्यक्रम हो।

प्रत्येक शृङ्खलामा ५ जना मुक्तककारलाई विजेता घोषणा गर्ने गरिन्छ। तिनै विजयी पाँच जना मुक्तककारका ५ वटा मुक्तकहरु फोटोमा मुक्तक प्रतियोगिताको एक सय ६४ औं शृङ्खलाबाट कनका खबरको अनलाइन पत्रिकाबाट छपाइँदै आइएको छ।