प्रधानमन्त्रीमा नियुक्त भएपछि पहिलो विदेश भ्रमणका रूपमा प्रधानमन्त्री बालेन्द्र शाह संयुक्त राष्ट्रसंघको ८१औँ महासभामा सहभागी हुन मंगलवार साँझ अमेरिकाको न्यूयोर्क प्रस्थान गर्नुभएको छ । प्रधानमन्त्री शाह नेपाली प्रतिनिधिमण्डलको नेतृत्व गर्दै महासभामा सहभागी हुन अमेरिका प्रस्थान गर्नुभएको हो ।
प्रधानमन्त्री शाहले यही असोज ८ गते अर्थात् सेप्टेम्बर २४ मा संयुक्त राष्ट्रसंघको महासभाको सत्रलाई सम्बोधन गर्ने कार्यक्रम तय भएको छ । उहाँले सम्बोधनका क्रममा नेपालले भोगिरहेको जलवायु संकट, भोटेकोशी बाढीबाट भएको मानवीय तथा भौतिक क्षति र जलवायु परिवर्तनका कारण नेपाल जस्ता न्यून उत्सर्जन गर्ने मुलुकले व्यहोर्नुपरेको असमान क्षतिका विषयलाई अन्तर्राष्ट्रिय समुदायसमक्ष उठाउने तयारी गर्नुभएको छ ।
भोटेकोशी बाढीपछि प्रधानमन्त्री शाहले आफ्नो अमेरिका भ्रमणलाई औपचारिक कूटनीतिक भेटघाटमा मात्र सीमित नगरी विपत्तिमा परेको नेपालको आवाज विश्व मञ्चमा पु¥याउने अवसरका रूपमा उपयोग गर्न खोज्नुभएको छ । गत भदौ १० मा आएको विनाशकारी बाढीपछि प्रधानमन्त्री शाहले सुरुमा महासभामा सहभागी नहुने संकेत गर्नुभएको थियो । तर विपत्तिपछि अन्तर्राष्ट्रिय समुदायको ध्यान नेपालतर्फ तान्नुपर्ने आवश्यकता देखाउँदै अन्ततः न्यूयोर्क जाने निर्णय गर्नुभएको हो ।
नेपालले भोगेको विपत्तिलाई जलवायु न्यायसँग जोडेर प्रधानमन्त्री शाहले विश्व समुदायको ध्यानाकर्षण गराउने तयारी गर्नुभएको छ । हिमाली मुलुक नेपालले जलवायु परिवर्तनमा न्यून योगदान गरे पनि त्यसको असर भने गम्भीर रूपमा व्यहोर्नुपरेको विषय उहाँको सम्बोधनको प्रमुख एजेन्डा बन्नेछ । भोटेकोशी बाढीका कारण ठूलो मानवीय क्षतिसँगै जलविद्युत्, सडक, पुल, सञ्चारलगायत भौतिक पूर्वाधारमा पुगेको क्षतिको विषय पनि अन्तर्राष्ट्रिय समुदायसमक्ष उठाइने तयारी छ ।
कनका खबर । २०८३ असोज ७