जुम्ला । जिल्ला समन्वय समिति जुम्लाको आयोजनामा आर्थिक सर्वेक्षण २०८१/०८२ को तयारी सम्बन्धी अन्तरक्रिया कार्यक्रम सम्पन्न भएको छ। प्रमुख जिल्ला अधिकारी राम बहादुर शाहीको अध्यक्षता र उपप्रमुख जनक थकालीको प्रमुख आतिथ्यतामा सम्पन्न उक्त कार्यक्रममा आर्थिक सर्वेक्षणको तयारी, आवश्यक समन्वय, आर्थिक सूचकहरूको संकलन तथा समग्र आर्थिक अवस्थाको मूल्यांकनबारे छलफल गरिएको थियो।
कार्यक्रममा कर्णाली प्रदेशको जुम्ला जिल्लाको समृद्धि र दिगो विकासका लागि प्रभावकारी नीति, योजना कार्यान्वयन, बजेट व्यवस्थापन तथा आगामी आर्थिक वर्षका रणनीतिक प्राथमिकताबारे व्यापक छलफल भयो।
नेपाल सरकार अर्थ मन्त्रालय, सिंहदरबार काठमाडौंबाट आएका अर्थशास्त्री कमलकान्त पौडेलले देशको आर्थिक स्थितिबारे जानकारी गराउँदै मुलुकको आर्थिक विकासलाई गति दिन आर्थिक सर्वेक्षणको नयाँ स्वरूपका लागि रचनात्मक सुझाव सङ्कलन गरिएको बताए। उनले नेपाल सन् १९७१ देखि अतिकम विकसित मुलुकको सूचीमा रहे पनि राष्ट्रसंघको ७६औं महासभाले नेपाललाई विकासशील मुलुकमा स्तरोन्नति गर्ने प्रस्ताव पारित गरिसकेको जानकारी दिए।
सिनियर उपसचिव टिकाराम भुसालले कर्णाली विकास र पूर्वाधारको अभावका कारण क्षेत्र पछि परेको भन्दै आवश्यकताका आधारमा नीति निर्माण गर्नुपर्नेमा जोड दिए। उनले कर्णालीका अर्गानिक उत्पादनलाई बजार उपलब्ध गराउने चुनौती रहेको उल्लेख गर्दै, आगामी बजेट व्यवस्थापनमा यसलाई प्राथमिकता दिइने बताए।
यस्तै, जुम्ला उद्योग वाणिज्य संघका अध्यक्ष पुरिचन्द्र देवकोटाले जुम्लाको उत्पादनलाई बाह्य बजारसम्म पुर्याउने संरचना निर्माणको आवश्यकता औंल्याए। उनले व्यवस्थित उद्योगको अभावका कारण स्थानीय उत्पादनले उचित बजार पाउन नसकेको बताए।
जिल्ला समन्वय समिति जुम्लाका उपप्रमुख जनक थकालीले अन्य जिल्ला र शहरभन्दा जुम्लामा पूर्वाधार विकासका धेरै चुनौती रहेको बताउँदै, नयाँ उद्योग स्थापना गर्न सहज कर प्रणाली लागू गर्नुपर्नेमा जोड दिए।
प्रमुख जिल्ला अधिकारी राम बहादुर शाहीले अर्थ मन्त्रालयको यो कार्यक्रमले जुम्लाको आर्थिक गतिशीलता र समृद्धिमा महत्वपूर्ण योगदान गर्ने विश्वास व्यक्त गरे। उनले कर्णालीको मुख्य समस्या र आवश्यकताका आधारमा बजेट विनियोजन गर्न अर्थ मन्त्रालयलाई अपिल गरे।
कार्यक्रमका सहभागीहरूले कर्णाली राजमार्गको सुधार, अर्गानिक उत्पादनको बजार अभाव, जडिबुटी व्यवसाय, जल तथा जमिन स्रोत व्यवस्थापन, र बजारकरणका विषयमा आफ्ना धारणा राखेका थिए।
प्रकाश उपाध्याय । २०८१ चैत्र १४