जुम्ला जिल्ला हिमा गाउँपालिकाको ५ नं वडालाई बाल विवाह मुक्त वडा घोषणा गरिएको छ। फागुन ७, बुधवारका दिन ‘बिहेवारी २० वर्ष पारि, हामी सबैको ऐक्यबद्धता, बालविवाह मुक्त हिमा गाउँपालिकाको प्रतिबद्धता’ भन्ने मूल नाराका साथ बाल विवाह मुक्त वडा घोषणा गरिएको हो।

हिमा गाउँपालिकाका सात वडामध्ये यसअघि तीन वटा वडा बालविवाह मुक्त घोषणा भईसकेको उक्त गाउँपालिकाका अध्यक्ष लक्ष्मण बहादुर शाहीले बताए। अन्य वडाहरूलाई पनि क्रमशः बालविवाह मुक्त बनाउने योजना रहेको शाहीले जनाएका छन्।

वडा नं ५ ले बालविवाह रोकथामका लागि आवश्यक सम्पूर्ण सुचकहरु पुरा गरे पश्चात यो घोषणा गरिएको शाहीले बताएका हुन्।

बाल संरक्षण नीति कार्यान्वयन, बालविवाहमुक्त अभियान सञ्चालन निर्देशिका, तथा बाल अधिकार संरक्षण समिति वडा, पालिका, र विद्यालय तहमा क्रियाशील रहेको आधारमा यो घोषणा गरिएको महिला तथा बालबालिका शाखा प्रमुख राज्यलक्ष्मी रावलले बताइन्।

उनका अनुसार हिमा गाउँपालिकाले बालविवाहविरुद्धको रणनीति तयार गरिसकेको छ, जसलाई व्यवहारमा उतार्दै लैजाने योजना बनाइएको छ।

बालविवाह अन्त्यका लागि कानूनी कठोरता अपनाइने जनाउँने र अबका दिनमा कसैले बालविवाह गर्न खोजे कडा कारबाही हुने गाउँपालिका प्रवक्ता रतन बहादुर शाहीले चेतावनी दिएका छन्।

यो अभियानलाई सशक्त बनाउन सरकारी तथा गैरसरकारी संस्थाहरूको समन्वयमा सचेतनामूलक कार्यक्रमहरू सञ्चालन गरिने भएको प्रवक्ता शाहीले जानकारी दिएका छन्।

नेपाल सरकारको सन् २०३० सम्म देशलाई बालविवाहमुक्त राष्ट्र बनाउने लक्ष्य/अभियानलाई हिमा गाउँपालिकाले पनि प्राथमिकता दिँदै सबै वडालाई बालविवाहमुक्त बनाउने प्रतिवद्धता जाहेर गरेको छ।