जुम्ला- राष्ट्रिय प्राकृतिक स्रोत तथा वित्त आयोगद्वारा गरिएको कार्यसम्पादन मूल्यांकनमा तातोपानी गाउँपालिका प्रथम स्थान हासिल गर्न सफल भएको छ। मूल्यांकनका लागि प्रयोग गरिएका १७ वटा सूचकका आधारमा तातोपानी गाउँपालिकाले ६७.५ अंक प्राप्त गर्दै जुम्ला जिल्लाका आठ वटा स्थानीय तहहरूलाई पछि पार्दै शीर्ष स्थान ओगटेको हो।
तातोपानी गाउँपालिकाका अध्यक्ष नन्दप्रसाद चौलागाईंले यो उपलब्धि हासिल गर्न योगदान पु¥याउने उपाध्यक्ष, प्रमुख प्रशासकीय अधिकृत, शाखा प्रमुख तथा सम्पूर्ण कर्मचारीहरूलाई विशेष धन्यवाद व्यक्त गरेका छन्। उनले यो सफलताले पालिकालाई थप प्रभावकारी ढंगले काम गर्न हौसला प्रदान गर्ने विश्वास व्यक्त गरे। साथै, स्थानीय सरकारप्रतिको जनविश्वास र धारणा पनि सकारात्मक बन्ने उनको भनाइ छ।
राष्ट्रिय प्राकृतिक स्रोत तथा वित्त आयोगले स्थानीय तहहरूको आर्थिक व्यवस्थापन, सेवा प्रवाह, सुशासन, पूर्वाधार विकास तथा समग्र कार्यसम्पादनलाई मूल्यांकन गर्दै आएको छ। यस मूल्यांकनमा तातोपानी गाउँपालिकाले उत्कृष्ट अंक प्राप्त गर्दा आगामी दिनमा अझ राम्रो सेवा प्रवाह गर्न प्रेरणा मिल्ने जनाइएको छ।
पालिका प्रमुख चौलागाईंका अनुसार तातोपानी गाउँपालिकाले आगामी दिनमा विकास निर्माण, बजेट व्यवस्थापन तथा जनकल्याणकारी योजनाहरूलाई थप प्रभावकारी बनाउने योजना बनाइसकेको छ। स्थानीय तहहरूको कार्यसम्पादन मूल्यांकनले पारदर्शिता, जवाफदेहिता र जनउत्तरदायी शासन प्रणालीलाई प्रवर्द्धन गर्ने उनको धारणा छ।
तातोपानी गाउँपालिकाले शिक्षादेखि स्वास्थ्य, कृषि, पूर्वाधार, सूचना प्रविधि र वातावरण संरक्षणजस्ता विविध क्षेत्रमा सक्रियता देखाउँदै आएको छ। मूल्यांकनमा प्राप्त सफलताले यी क्षेत्रहरूमा अझ व्यवस्थित र प्रभावकारी सेवा प्रवाह गर्न मद्दत पुग्ने पालिका प्रमुखको भनाइ छ।
पालिकाले आगामी वर्षहरूमा डिजिटल प्रविधिको प्रयोगमार्फत प्रशासनिक सुधार गर्ने, नागरिकमैत्री सेवा प्रवाहलाई थप प्रभावकारी बनाउने तथा समावेशी विकासलाई प्राथमिकता दिने योजनाहरू अघि सारेको छ। जनप्रतिनिधि तथा कर्मचारीहरूको निरन्तर प्रयासले तातोपानी गाउँपालिकालाई उदाहरणीय स्थानीय तह बनाउने लक्ष्य रहेको अध्यक्ष चौलागाईंले बताए।
तातोपानी गाउँपालिका स्थानीय आर्थिक विकास मुल्यांकन (LED) को ९२ नम्बर र यो संगै आ.व २०८०/८१ मा LISA मा ९३.७५ र स्थानीय तह बित्तीय सुशासन जोखिम मुल्यांकन FRA ९० नम्बर ल्याई जिल्लामा सबैमा प्रथम भएको थियो
कनका खबर । २०८१ फाल्गुन १