काठमाडौं : विशेष महाधिवेशनबाट चुनिएका नेपाली कांग्रेस सभापति गगन कुमार थापाले नयाँ  नेतृत्वको अभिलेख निर्वाचन आयोगले अद्यावधिक गर्नेमा आफू पूर्ण विश्वस्त रहेको बताएका छन्। बिहीबार नेपाली कांग्रेसको विशेष महाधिवेशनले गरेको निर्णय अद्यावधिक गराउन निर्वाचन आयोग पुगेका सभापति थापाले निर्वाचन आयोगलाई माघ ६ गतेको समयसीमालाई पनि ख्याल गरी चाँडो निर्णय गरिदिन पनि आग्रह गरेको बताए। ‘नेपाली कांग्रेसले विशेष महाधिवेशन सम्पन्न गरेर नयाँ नेतृत्व चयन गरेको अवस्था छ। यसबारे निर्वाचन आयोगमा लिखित र मौखिक रुपमा अद्यावधिकका लागि बुझाएका छौं,’उनले भने,’निर्वाचन आयोगले चाँडोभन्दा चाँडो कांग्रेसको विशेष महाधिवेशनको निर्णयलाई अद्यावधिक गर्छ भन्ने कुरामा पूर्ण विश्वस्त छु।’
उनले निर्वाचन आयुक्त रामप्रसाद भण्डारीलाई विवरण अद्यावधिक गराउनका लागि तथ्य, प्रमाण  र आवश्यक कागजात बुझाएको बताए। उनले विशेष महाधिवेशन सुरू भइसकेपछि पूर्वसभापति शेरबहादुर देउवा नेतृत्वको कार्य समिति भंग भएको जानकारी समयमै निर्वाचन आयोगलाई गराइसकेको जिकिर गरे।

 बिहीबार बसेको नयाँ कार्यसमितिको बैठकपछि सभापति थापा नेतृत्वको पदाधिकारीहरू विशेष महाधिवेशनबाट चयन भएको नयाँ कार्यसमितिको अद्यावधिकका लागि निर्वाचन आयोग पुगेका छन्। सभापति थापासँगै उपसभापति विश्व प्रकाश शर्मा पनि छन्।
थापा नेतृत्वमा कांग्रेसले पुस २७ गतेदेखि ३० गतेसम्म काठमाडौंमा विशेष महाधिवेशन गरेको थियो।  विशेष महाधिवेशनबाट थापा नेतृत्वमा नयाँ कार्यसमिति गठन भएको छ।