गत माघ २२ गते मंगलबार नया पत्रिका बाट ‘अन्तरजातीय विवाह गर्ने दलित युवामाथि गृहमन्त्रीकै निर्देशनमा अत्याचार’ भन्ने शिर्षकमा एउटा समाचार प्रकासित भएको थियो ।
उक्त समाचारमा उल्लेख गरेअनुसार सर्लाहीको बरहथवा नगरपालिका-४ का सत्येन्द्रकुमार राम (चमार) र बरहथवा-५ की नेहा रौनियारबीच २०८१ पुस ३ गते सम्पन्न अन्तरजातीय प्रेम विवाहलाई राज्य संयन्त्र परिचालन गरेर तोड्ने प्रयास भएको कुरा प्रष्ट पारिएको थियो।
अन्तरजातीय प्रेम विवाह गरेका जोडिको सम्बन्ध तोड्न खोजेको भन्दै गृहमन्त्री रमेश लेखकलाई आरोप लगाईएको थियो।
अन्तरजातीय विवाह गर्ने जोडिलाई प्रोत्साहन गर्ने सरकारले आफै जातिय विभेदलाई बढावा गरेको भन्दै देशभरमा दलित अभियान्ताहरुले विरोध प्रदर्शन गरेका छन्।
अन्तरजातीय प्रेमविवाह गरेका सर्लाहीको सत्येन्द्रकुमार रामलाई प्रहरीले तीनपटक सम्म पक्राउ गरेर थुनामा राखी यातना दिएको विषयमा उनीहरूले विरोध प्रदर्शन गरेका हुन् ।
पछिल्लो समय जातिय विभेद विरुद्ध चर्को आवाज उठाउँदै आएका दलितका लागि दलित अभियान नेपालका संयोजक खगेन्द्र सुनार सहितको टोलीले काठमाडौँको माईतिघर मण्डलामा गृहमन्त्री रमेश लेखको राजिनामाको माग गर्दै विरोध प्रदर्शन गरेका हुन्।
गृहमन्त्री लेखकलाई तत्काल कार्वाही हुनुपर्ने भन्दै अभियान्ता खगेन्द्र सुनारले प्रधानमन्त्रीलाई दबाव दिन प्रदर्शनी गरेको बताएका छन्। यद्यपी कार्वाही नगरे आन्दोलनको स्वरुप फरक र भयंकर हुने सुनारले बताएका हुन्।
त्यस्तै जुम्लाका विभिन्न भातृसंगठनहरुले संयुक्त रुपमा जिल्ला प्रशासन कार्यालय जुम्लामा बिज्ञप्ती बुझाएका छन्।
बिज्ञप्तिकाअनुसार गृहमन्त्री रमेश लेखकको ठाडो निर्देशनमा, प्रहरी महानिरीक्षक र अपराध अनुसन्धान कार्यालय प्रमुख सहितका उच्च पदस्थ प्रहरीहरूको प्रत्यक्ष संलग्नतामा प्रेम विवाह गरेका जोडी माथि अन्याय भएको छ।
भारत घुम्न गएका सत्येन्द्र र नेहालाई गैरन्यायिक ढंगले पक्राउ गरिएको, अदालतमा कानूनअनुसार विवाह दर्ता भइसकेपछि समेत अर्को अदालत मार्फत बालविवाहको मुद्दा चलाइएको, युवकले सुरक्षाका लागि प्रहरीमा दिएको निवेदन बेवास्ता गरिएको तथा झुटा अभियोग लगाएर प्रहरी हिरासतमा राखिएको आरोप लगाइएको छ।
विज्ञप्तिमा युवती नेहा रौनियारलाई माइती पक्षले बन्धक बनाई शरीरमा आइरनले डाम्ने जस्ता क्रूर यातना दिएको दाबी गरिएको छ। घटनामा प्रहरी स्वयं संलग्न रहेको भन्दै भातृसंघठनहरूले न्याय माग गरेका छन्। जात व्यवस्थालाई जोगाउन राज्यले सत्ता र शक्तिको चरम दुरुपयोग गरेको भन्दै उनीहरूले गृहमन्त्री रमेश लेखकको राजीनामा माग गरेका छन्।
भातृसंघठनहरूले सत्येन्द्रकुमार राम र नेहा रौनियारलाई जात व्यवस्था विरोधी योद्धा भन्दै उनीहरूको संघर्षको उच्च प्रशंसा गरेका छन्। घटनामा संलग्न प्रहरी अधिकारीहरूलाई कानुनी कारबाहीको दायरामा ल्याउनुपर्ने, पीडित जोडीलाई उचित सुरक्षा तथा क्षतिपूर्ति दिनुपर्ने माग गर्दै, समयमै न्याय नदिए सशक्त आन्दोलन गर्ने चेतावनी दिएका छन्।
विज्ञप्तिमा नेपाल दलित संघका केन्द्रीय सदस्य नरविर सुनार, नेपाल दलित मुक्तिमोर्चा जुम्लाका जिल्ला संयोजक चन्द्र बहादुर नेपाली, र नेपाल दलित मुक्ति संगठन सर्लाहीका जिल्ला अध्यक्ष लक्ष्मण सुनारको हस्ताक्षर रहेको छ। उनीहरूले जात व्यवस्थाको अन्त्यका लागि न्यायप्रेमी सबैलाई आन्दोलनमा साथ दिन हुन अपिल गरेका छन्।
विश्व प्रकाश । २०८१ माघ २३