मुगु, पुस १३ गते
नेपाल पत्रकार महासंघ मुगु शाखाले जिल्लामा क्रियाशील दुई जना अग्रज पत्रकारलाई सम्मान गरेको छ। शाखाका नव निर्वाचित समितिको पहिलो बैठकले स्थापना अध्यक्ष विनोद कुमार मल्ल र निवर्तमान अध्यक्ष नृपेन्द्र बहादुर मल्ललाई सम्मान गरेको हो।
पत्रकार विनोद कुमार मल्लले रेडियो नेपालका मुगु समाचारदाता हुँदै २६ वर्षदेखि पत्रकारितामा सक्रिय योगदान पुर्याउँदै आउनुभएको छ। यस्तै, पत्रकार नृपेन्द्र बहादुर मल्लले विगत २१ वर्षदेखि राष्ट्रिय समाचार समिति (रासस), हाम्रो कुरा डटकम, हिमालय टाइम्स, गोरखापत्र दैनिक, र राजधानी दैनिकजस्ता प्रतिष्ठित सञ्चारमाध्यमहरूमा आवद्ध भई जिल्लामा पत्रकारिता गर्दै आउनुभएको छ।
महासंघका सचिव नन्द बहादुर रोकायका अनुसार, विनोद कुमार मल्ललाई मुगु जिल्लामा पत्रकारिता जग बसाल्नुभएको योगदानका लागि “वरिष्ठ पत्रकार” उपाधि प्रदान गर्दै सम्मान गरिएको हो। त्यस्तै, नृपेन्द्र बहादुर मल्लले दुई कार्यकाल शाखा अध्यक्षको रूपमा कुशल र समावेशी नेतृत्व प्रदान गरेको र मुगु शाखाको प्रतिष्ठा बढाउन योगदान पुर्याएकाले सम्मान गरिएको हो।
दुवै अग्रज पत्रकारलाई महासंघका अध्यक्ष अचुत राज भण्डारीले सम्मानपत्र र खादा अर्पण गरी सम्मान गर्नुभएको थियो।
त्यस अवसरमा मुगु शाखाका निवर्तमान उपाध्यक्ष सुमित्रा रावल र केन्द्रिय परिषद् प्रतिनिधि विमल हमाललाई नेपाल पत्रकार महासंघ कर्णाली प्रदेश समितिको सदस्यमा निर्वाचित भएकोमा बधाइसमेत दिइएको थियो।
मोहन शाही । २०८१ पुष १३