जुम्ला – नेपाल रेडक्रस सोसाइटी जुम्लाले चन्दननाथ नगरपालिका भित्रका चारवटा विद्यालयमा विधालयस्तरीय सिमुलेसन कार्यक्रम सम्पन्न गरेको छ। नगरपालिकामा रहेका सातवटा (मावि र आवि) विद्यालयमा सञ्चालन गर्न लागिएको यस कार्यक्रम कर्णाली मावि अनामनगर, रत्नचुडेश्वर मावि बोहरागाउँ, मालिका आवि आचार्यबाडा, र सम्भुनाथ ग्यानकुञ्ज मावि श्रीढुसकामा सम्पन्न भएको हो।

विधालय सुधार योजना अन्तर्गत कृत्रिम घटना अभ्यास कार्यक्रमको आयोजना गरिएको हो। यसअन्तर्गत भूकम्पजस्ता जोखिम तथा विपदको समयमा जोखिम न्यूनिकरण कसरी गर्ने भन्ने विषयमा विद्यार्थीहरूलाई पूर्वतालीम प्रदान गरिएको नेपाल रेडक्रस सोसाइटी जुम्लाका सामुदायिक फेसिलिटेटर करविर चन्दले जानकारी दिए।

चन्दका अनुसार विधालयहरूको शैक्षिक स्तर बलियो बनाउन र विद्यार्थीलाई सशक्त बनाउन नेपाल रेडक्रसले विद्यालयहरूसँग सहकार्य गर्दै थुप्रै कार्यक्रम सञ्चालन गर्दै आएको छ। विपदका समयमा बालबालिका बढी प्रभावित हुने भएकाले उनीहरूलाई सिमुलेसन अभ्यासमा सहभागी गराइएको उनले बताए।

कार्यक्रममा सहभागी सम्भुनाथ ग्यानकुञ्ज माविका प्रधानाध्यापक लोक परमशाद हमालले विधालयमा विपद व्यवस्थापन कोष स्थापना गर्ने प्रतिबद्धता जनाए। उनले रेडक्रसका कार्यक्रमहरूले विधालयको शैक्षिक स्तर वृद्धि गर्न मद्दत पुर्‍याएको उल्लेख गरे।

यसैगरी, चन्दननाथ नगरपालिका शिक्षा शाखाका प्रमुख खडानन्द चौंलागाईले विपद व्यवस्थापन र जोखिम न्यूनीकरणसम्बन्धी यस्ता कार्यक्रमहरू उत्कृष्ट रहेको बताए। उनका अनुसार विद्यार्थीले विपद जोखिम न्यूनीकरण गर्न पूर्वतयारीका लागि ज्ञान आर्जन गर्न आवश्यक छ।

नेपाल रेडक्रस सोसाइटी जुम्लाको यो प्रयासले स्थानीय विधालयहरूलाई जोखिम व्यवस्थापन र विद्यार्थी सशक्तीकरणमा महत्त्वपूर्ण योगदान पुर्‍याएको छ।