जुम्ला फुटबल क्लबले दोभान शान्ति युवा क्लबलाई पराजित गर्दै दोस्रो अमृत स्मृति कप फुटबल प्रतियोगिताको उपाधि जितेको छ। खेलको निर्धारित समयभरि रोमाञ्चक र प्रतिस्पर्धात्मक भएपनि दोभान शान्ति युवा क्लबले गोल फर्काउन नसक्दा जुम्ला फुटबल क्लब विजयी भएको हो।

पहिलो हाफ गोलरहित बराबरीमा सकिएपछि खेलको दोस्रो हाफमा जुम्ला फुटबल क्लबका धर्मेन्द्र कुँवरले लगातार २ गोल गरे भने क्याप्टेन सुनिल थापा मगरले थप १ गोल गर्दै उपाधि पक्का गरे।

लेकाली युवा क्लबद्वारा आयोजित प्रतियोगितामा २२ टिम सहभागी थिए। फाइनलमा पुगेका जुम्ला फुटबल क्लबलाई नगद एक लाख दुई हजार दुई सय दुई रुपैयाँसहित ट्रफी, मेडल र प्रमाणपत्र प्रदान गरियो भने उपविजेता दोभान शान्ति युवा क्लबले नगद ५१ हजार एक सय ११ रुपैयाँसहित ट्रफी र प्रमाणपत्र प्राप्त गरे।

पुरस्कार वितरण कार्यक्रममा चन्दननाथ नगरपालिकाका मेयर राजुसिंह कठायतले यस्ता प्रतियोगिताले खेलकुद क्षेत्रको प्रवर्द्धनमा योगदान गर्ने बताउँदै नयाँ खेलाडीलाई उत्प्रेरित गर्ने विश्वास व्यक्त गरे।