जुम्ला – अशोक नमुना आधारभूत विद्यालयमा शौभाग्य शाह फाउन्डेसनले किन्डरलाइभ नेपालको सहयोगमा शैक्षिक उपकरण तथा खेलकुद सामग्री वितरण गरेको छ। फाउन्डेसनले विद्यालयलाई टेबुल टेनिस, फुटबल, भलिवल, ल्यापटप, स्पिङ्क, ब्याटमिन्टन, जिम उपकरण लगायतका सामग्रीहरू प्रदान गरेको हो।

सो सामग्री वितरण कार्यक्रममा प्रमुख अतिथि जुम्लाका जिल्ला समन्वय प्रमुख गौरिन्द आचार्य, विशेष अतिथि चन्दननाथ नगरपालिकाका मेयर राजुसिंह कठायत र उपमेयर रामदेवी खड्का लगायतको उपस्थिति रहेको थियो।

कार्यक्रममा बोल्दै मेयर कठायतले प्रदान गरिएको सामग्रीलाई सदुपयोग गरी विद्यार्थीहरूको शैक्षिक तथा खेलकुद क्षेत्रमा थप विकास गरिने प्रतिबद्धता जनाए। साथै, उनले नगरपालिकाको तर्फबाट पनि भविष्यमा आवश्यक सहयोग गर्ने वचन दिए। प्रमुख अतिथि आचार्यले पनि फाउन्डेसनले विभिन्न दाताहरूबाट संकलन गरेको सहयोगको सही प्रयोग गरिनुपर्नेमा जोड दिँदै फाउन्डेसनलाई धन्यवाद दिए।

शौभाग्य शाह फाउन्डेसनका अध्यक्ष अनुप शाहले विद्यालयलाई सहयोग गर्न पाउँदा आफू अत्यन्तै खुसी भएको बताउँदै यसले विद्यार्थीहरूको शैक्षिक र खेलकुद गतिविधिमा सुधार आउने विश्वास व्यक्त गरे।

विद्यालयलाई प्रदान गरिएको यी सामग्रीहरूले विद्यार्थीहरूको शैक्षिक तथा खेलकुद गतिविधिमा थप सुधार ल्याउने अपेक्षा गरिएको छ।