हिमा गाउँपालिकाको बाँजागाड खोला खानेपानी तथा सरसफाई योजनाको खानेपानी निर्माण भइ उद्घाटन सम्पन्न भएको छ।
बिहीबार हिमा गाउँपालिकाका अध्यक्ष लक्ष्मण बहादुर शाहीले खानेपानी धाराको उद्घाटन गरेका हुन। उनका अनुसार १६ लाख ५१ हजार ती सय ७१ रुपैया ६० पैसा लगानीमा बाँजागाडमा २० वटा धारा निर्माण गरिएको छ।
सबैका लागि दिगो खानेपानी तथा सरसफाई आयोजना (सुस्वा) द्वारा आयोजनाको निर्माण सम्पन्न भएको हो।
जसमा नेपाल सरकार, युरोपियन युनियन, फिनल्यान्ड सरकार र हिमा गाउँपालिकाको आर्थिक सहयोग रहेको हिमा गाउँपालिका सुस्वा परियोजनाकी वास संयोजक सुमिता शाहीले बताइन्।
उनले भनिन्, ‘सुस्वा आयोजनाको दिर्घकालीन लक्ष्य अन्तर्गत हिमा गाउँपालिका भित्रका प्रत्येक नागरिकलाई इन्लाइन क्लोरेसन सहितको स्वच्छ र गुणस्तरीय खानेपानी पुर्याउने हो।’
इन्लाइन क्लोरेसन प्रविधि जडान गरि धारामा सुद्धिकरण भई पानी आउने व्यवस्था मिलाइएको हुनाले हिमाबासीको शुद्ध खानेपानीमा पहुँच विस्तार हुँदै गएको अध्यक्ष शाहीको भनाइ छ।
‘हिमा गाउँपालिकाका प्रत्येक घरधुरिमा खानेपानी पुर्याउने लक्ष्य अन्तर्गत बाँजागाड खोलामा खानेपानी घारा उद्घाटन गरिएको छ।’
अध्यक्ष शाहीले भने, ‘यसले बाँजागाड खोला बस्तीका बासिन्दालाई खानेपानीको सहज पहुँच पुग्ने र गाउँपालिका केन्द्र तोकिएको स्थान भएकाले पछिका दिनमा गाउँपालीकालाई पनि पानीको सहजता हुनेछ।’
बाँजागाडमा एक घर एक धारा निर्माण भई स्वच्छ खानेपानीको उपलब्धता हुँदा स्थानीयबासीहरु खुसी भएका छन्।
यसैबीच बाजागाडा खोलाकी स्थानीय बासिन्दा धनपुरा शाहीले एक घर एक धारा निर्माण भइ स्वच्छ खानेपानी उपलब्ध गराएकोमा सुस्वा आयोजना र हिमा गाउँपालिकालाई धन्यवाद दिइन्।
प्रकाश उपाध्याय । २०८१ असार १३