दलितका लागि दलित अभियान नेपालको दैलेखमा जन-प्रदर्शन तथा जागरण सभा सप्पन्न भएको छ।
कार्यक्रमका प्रमुख अतिथि राष्ट्रिय दलित आयोगका अध्यक्ष देवराज विश्वकर्माले मानिसलाई जबर्जस्ति दलित बनाएर राज्यले अपराध गरेको बताए।
उनका अनुसार देश, समाज दलितको आँसु, रगत बगेको टुलुटुलु हेरेर बसेकाले अब दलित आफ्नो लागि आफै लड्नुपर्ने दिन आएका छन्। मञ्चमा उभिएर भाषण गर्ने तर घरमा दलितलाई छिर्न नदिने अवस्थामा अहिले पनि छ।
दलितको अभियान गैरदलितको विरुद्ध नभएको बताउँदै उनले कानुन प्रतिबन्ध गरेको कर्म गर्ने छुट कसैलाई नभएको बताए।
‘दलित आयोग तिनै तहको सरकार मार्फत जातीय विभेद र हिंसाको विरुद्ध कार्य गरिरहेको छ,’ उनले भने।
कर्णाली प्रदेश सभा सदस्य उर्मिला विश्वकर्माले दलित आन्दोलनको लागि आफू सबै त्यागेर लाग्न तयार रहेको बताइन्। उनले भनिन्, ‘दलित समुदायको न्याय र मुक्तिका लागि पार्टी भन्दा माथि उठेर लाग्नुपर्ने परिस्थिति बनेको छ।’
कर्णाली प्रदेशको निवर्तमान मन्त्री समेत रहेकी विश्वकर्माले कर्मचारीतन्त्रका असहयोगका कारणले दलितको कानुन बन्न नसकेको बताइन्।
कार्यक्रममा दलितका लागि दलित अभियानका संयोजक खगेन्द्र सुनारले विभिन्न पार्टीमा लागेका दलित अब दलित बन्न तयार हुनुपर्ने बताए।
‘हिजोसम्म अरुका लागि दलित लडे अब दलितका लागि लड्नुपर्छ, उहाले भन्नुभयो – दलित-दलित एक हुनुपर्छ,’ उनले भने, ‘आफ्नो अधिकारको लागि छुट्टै शक्ति निर्माण गरेर आत्मसम्मानको अभियानमा जुट्नु पर्छ।’
चर्चित लोक तथा दोहोरी गायिका टीका सानूले जातीय विभेद विरुद्ध गीत गाएकी थिइन्।
कार्यक्रममा भगवतीमाई युवा संजालले समन्वय गरेको थियो भने स्थानीय अन्य संघ संस्थाले सहकार्य गरेका थिए।
विश्व प्रकाश । २०८१ जेष्ठ ३०