खाद्य गुणस्तर अभिवृद्धिबारे सचेतना फैलाउने उद्देश्य लिएर आएका मास्टर सेफ सन्तोष शाह भन्छन्, ‘मलाई लागेको थियो अथवा मैले सुनेको थिएँ, कर्णाली त निकै सुन्दर छ रे। मलाई पटकपटक मनभित्र खुलदुली भैरहन्थ्यो। कहिले म कर्णाली पुगौंला? कहिले जुम्ला पुगौंला? जुम्ला मार्सी धानको लागि पनि प्रख्यात ठाउँ जहाँ विश्वकै अग्लो स्थानमा धान फल्छ। त्यो ठाउँमा जान पाउँदा कस्तो होला लागेको थियो मलाई।’

उनले नजिकबाट नियालेर जुम्ला साँच्चिकै दुर्गम नभई सुगम रहेक पाएको बताए। उनका अनुसार कर्णाली राजमार्गबाट यात्रा गर्दा दुर्गममा हिँडिरहेको भान हुन्छ।

‘यात्राको क्रममा मात्रै लाग्ने रहेछ कतै दुर्गम पो हो कि भनेर। तर जब यो रमणीय ठाउँमा पुगेँ तब दुर्गमको परिभाषा नै हरायो मेरो मनबाट,’ उनले थपे, ‘किताबहरुमा पढेको दुर्गम जुम्ला र स्वयंम आएर घुमेको सुगम जुम्ला धेरै सुन्दर रहेछ। मलाई साह्रै रमाइलो लागिरहेको छ।’

१५ वर्ष बढी विदेशका फाइम स्टार होटेलमा काम गरेका मास्टर सेफ साह खानाका विविध परिकारका लागि चर्चित छन्। उनले जनकपुरमा मिथिला थाली सुरु गरेका थिए। जुन आज विश्वचर्चित छ।

कर्णालीमा उत्पादित रैथाने बालीको परिकार कस्तो हुन्छ? यसलाई कसरी विश्वबजारमा लिन सकिन्छ भनेर बुझ्न आएका उनले कर्णाली नियाल्दा सम्भावनाको खानी रहेको बताए। उनले भने, ‘हामी सबैले जुम्लामा उत्पादित बालीहरुको प्रवर्द्धन गर्नुपर्छ। विश्वबजारसम्म यहाँ उत्पादन भएको चिजवस्तु पुर्‍याउन पाए कति राम्रो हुन्थ्यो होला?’

उनका अनुसार यहाँ उत्पादन भएका अन्नबालीलाई विविध तरिकाबाट खानाका परिकार बनाउन सकियो भने जुम्ला निकै अगाडि बढ्न सक्छ। विश्वको उचो उच्च स्थानमा फलेको अन्नबाली निकै स्वादयुक्त हुन्छ। यो स्वाद यो चिसो सुन्दर शान्त ठाउँमा आएर पर्यटकहरुले चाक्न पाए भए भने झनै मोहित हुनेछन्।