यार्सागुम्बा टिप्प डोल्पा पाटनमा गएर वेपत्ता एक युवाको हेलिकप्टरबाट उददार गरिएको छ। पाटनमा अलपत्र परेको अवस्थामा पातारासी -३ मोहरीगाउँका ओमप्रकाश बुढालाई उद्दार गरिएको हो।
उनी एक हप्तादेखि बिरामी परेका थिए। यार्सागुम्बा टिप्न पाटनमा गएका साथीहरुले खबर गरेपछि घर परिवार र आफन्त थाहा पाएको ओम प्रकाशका बुबा आइतराम बुढाले बताए।
‘हामीले सांसद विनिता कठायत र देवेन्द्र बहादुर शाहीलाई फोन गरेका थियौं,’ उनले भने, ‘उहाँहरुको सहयोगमा छोरालाई जुम्ला ल्याउन सकिएको छ।’
सांसदहरुको व्यक्तिगत सहयोग र समुदायका मान्छेहरुले रकम संकलन गरेपछि हेलिकप्टर रिजर्भ गरि डोल्पामा यार्चागुम्बा टिप्न गएर बेपत्ता युवाहरुको उद्दार गरिने भएको छ।
राष्ट्रिय स्वतन्त्र पार्टीकी सांसद विनिता कठायतले एक लाख २५ हजार, कर्णाली प्रदेशका सांसद देवेन्द्र बहादुर शाहीले २० हजार र स्थानीय समुदायको सात लाख सहयोगमा हेलिकप्टर रिजर्भ गरि उनीहरको उद्दार गरिएको हो।
अन्नपूर्ण प्रालिको हेलिकप्टर निजी तवरबाट पहल गरि बेपत्ता युवाको उद्दार गरिएको सांसद कठायतले जानकारी दिइन्। उनले भनिन्, ‘जुम्लाको पातारासी गाउँपालिका -३का चार जना युवाहरु डोल्पाको साल्दाङ फोतगाउँ पासु क्याम्प क्षेत्रमा अलपत्र परेको खबर पाएपछि उद्दार कार्यमा लागिएको हो।’
सरकारी तवरबाट हेलिकोप्टरको व्यवस्थाको लागि पत्र पठाए पनि समयमै नतिजा नआएपछि निजी तवरबाट हेलिकप्टर रिजर्भको प्रयत्न गरिएको पर्यटन व्यवसायी भानु देवकोटाले जानकारी बताए।
‘यार्सागुम्बाको सिजनमा हरेक वर्ष कोही न कोही मान्छे वेपत्ता पर्ने र जनधनको क्षति हुँदै आएको छ,’ उनले भने, ‘अबका दिनमा यार्चागुम्बु टिप्न जाने सबैको बिमा गरि क्षति न्युनिकरणको कोसिस गरिनेछ।’
हेलिकप्टरबाट उद्दार गरिएका ओम प्रकाशलाई स्वासप्रस्वासमा समस्या देखिएको हुनाले थप उपचारका लागि कर्णाली स्वास्थ्य विज्ञान प्रतिष्ठानमा लगिएको छ।
भिडियो हेर्नुस्
विश्व प्रकाश । २०८१ जेष्ठ २