कर्णाली स्वास्थ्य विज्ञान प्रतिष्ठानमा एन्टिमाइक्रोबियल प्रतिरोध कार्यशाला प्रशिक्षण 

जुम्लामा २०८१ चैत १६ गते शनिबार कर्णाली स्वास्थ्य विज्ञान प्रतिष्ठानमा सुर्खेतका ३० वर्षीय मधुसुदन काफ्लेद्वारा आयोजित एन्टिमाइक्रोबियल प्रतिरोध (एएमआर) कार्यशाला प्रशिक्षण कार्यक्रम सम्पन्न भएको छ।

एएमआर क्लब र निम्याट नेपालको संयुक्त आयोजनामा भएको यो कार्यक्रममा कर्णाली स्वास्थ्य विज्ञान प्रतिष्ठानका संकाय प्रमुखहरू, स्वास्थ्यकर्मीहरू र युवा अभियन्ताहरूको सहभागिता थियो।

यो कार्यशालाले विश्व स्वास्थ्य संगठन (डब्लूएचओ) का ई-लर्निङ कोर्सहरू पूरा गरेका सहभागीहरूलाई एन्टिमाइक्रोबियल प्रतिरोध र स्कूल स्वास्थ्य कार्यक्रमबारे गहिरो बुझाइ र व्यावहारिक ज्ञान प्रदान गर्ने लक्ष्य राखेको थियो।

मधुसुदनको यो अभियान सुर्खेतको लाटिकोइली स्वास्थ्य चौकीबाट सुरु भएको हो। यो अभियानमा एक हजारभन्दा बढी युवा जोडिएका छन्, जसले ५५ हजार विद्यार्थी र एक हजारभन्दा बढी सामाजिक अगुवालाई क्षयरोगबारे सचेत गराईएको छ।

कार्यशालामा सहजकर्ताको भूमिका निर्वाह गरेका तिला गाउँपालिकाका जनस्वास्थ्य निरीक्षक कमल रावत र निम्याट नेपालकी सदीक्षा सापकोटाले पनि यो अभियानमा महत्वपूर्ण योगदान दिएका छन्।

नेपालमा वार्षिक ६९ हजार क्षयरोगी थपिने र १७ हजारको मृत्यु हुने तथ्यांकले यो अभियानको सान्दर्भिकता झल्काउँछ। कुनै बाह्य आर्थिक सहयोगबिना डब्लूएचओ र राष्ट्रिय क्षयरोग नियन्त्रण केन्द्रको प्राविधिक सहयोगमा चलिरहेको यो पहलले स्वास्थ्य क्षेत्रमा ठूलो परिवर्तनको आशा जगाएको छ।

प्रकाशित मितिः   २०८१ चैत्र १६ at 2:00 pm 

  • कमेन्ट (Comment)