काठमाडौं, मंसिर १३ – संस्कृति, पर्यटन तथा नागरिक उड्डयनमन्त्री बद्री पाण्डेले बौद्धमार्गीको योगदानले विश्वभर शान्ति फैलाउन अतुलनीय भूमिका खेलेको बताउनुभएको छ। काठमाडौंमा आयोजित चौथो विश्व शान्ति पूजाका अवसरमा विहीबार आयोजित कार्यक्रममा बोल्दै मन्त्री पाण्डेले बौद्धमार्गी मूल्य र आदर्शले समाजलाई शान्ति र सद्भावको मार्गमा डोर्‍याउन सघाएको उल्लेख गर्नुभयो।

मन्त्री पाण्डेले बौद्धमार्गी विचार र शिक्षाले ज्ञान र आत्मिक समृद्धिलाई धन र भौतिक सुखभन्दा प्राथमिकता दिने समाज निर्माणमा महत्वपूर्ण प्रभाव पार्ने बताउनुभयो। उहाँले समाजमा बढ्दो भौतिकतावाद र तनावका बीच बौद्ध धर्मका सिद्धान्तहरू विश्व शान्ति स्थापनाका लागि प्रभावकारी माध्यम बन्न सक्ने विश्वास व्यक्त गर्नुभयो।

नेपाललाई शान्तिको मुहानका रूपमा उल्लेख गर्दै मन्त्री पाण्डेले विश्वका प्रत्येक मानिसले कम्तीमा एकपटक नेपाल भ्रमण गर्नुपर्ने आवश्यकता औंल्याउनुभयो। उहाँले भन्नुभयो, “नेपालले शान्तिको सन्देश प्रवाह गर्ने केन्द्रका रूपमा विश्वभर आफ्नो पहिचान स्थापित गरेको छ। यहाँ आउने पर्यटकहरूलाई पुनः नेपाल फर्कन प्रेरित गर्ने वातावरण सिर्जना गर्न हामी सबैले भूमिका खेल्नुपर्छ।”

कार्यक्रममा मन्त्री पाण्डेले “विश्व एक परिवार हो” भन्ने अवधारणालाई अघि सार्दै सबै मानव जातिबीच एकता र मेलमिलाप कायम गर्नुपर्नेमा जोड दिनुभयो। उहाँले बौद्धमार्गी दर्शन र नेपालका शान्तिपूर्ण अभ्यासहरूले यो धारणालाई विश्वव्यापी बनाउने विश्वास व्यक्त गर्नुभयो।

चौथो विश्व शान्ति पूजा कार्यक्रमले बौद्ध धर्मका शान्ति, करुणा र सह-अस्तित्वका सिद्धान्तलाई उजागर गर्ने उद्देश्य राखेको थियो। कार्यक्रममा बौद्ध धर्मावलम्बीहरू, धार्मिक गुरुहरू, तथा विभिन्न देशका प्रतिनिधिहरूको उपस्थिति रहेको थियो।

नेपाल बौद्ध धर्मको उद्गमस्थल र भगवान् बुद्धको जन्मभूमि भएकोले यसले शान्ति र सद्भावका लागि एउटा प्रेरणादायी भूमिका निर्वाह गरिरहेको उल्लेख गर्दै मन्त्री पाण्डेले नेपालको पर्यटन र सांस्कृतिक सम्पदालाई विश्वभर प्रवर्द्धन गर्न सरकार प्रतिबद्ध रहेको स्पष्ट गर्नुभयो।

यस अवसरमा अन्य वक्ताहरूले पनि बौद्ध धर्मले विश्वभर शान्ति, करुणा र एकताको भावना फैलाउन महत्त्वपूर्ण योगदान पुर्‍याइरहेको विचार व्यक्त गरे।