जुम्लाको कनका सुन्दरी गाउँपालिकाले वडाबाटै सामाजिक सुरक्षा भत्ता वितरणमा गर्न थालेको छ। गाउँपालिकाले नीतिगत निर्णय गरेर पालिकाको केन्द्रमा रहेको बैंकमार्फत वितरण हुने सामाजिक सुरक्षा भत्ता वडा र बस्तीस्तरमै पुगेर वितरण गरेको हो।
गाउँपालिकाले आर्थिक वर्ष २०८०/०८१ अन्तिम चौथो सामाजिक सुरक्षा रकम वितरण गरिएको गाउँपालिका सामाजिक सुरक्षा तथा पञ्जिकरण शाखा प्रमुख दिपेन्द्र प्रसाद उपाध्यायले बताए।
‘बैंकिङ प्रणालीमार्फत वितरण हुँदै आएको सामाजिक सुरक्षा भत्तालाई लाभग्राहीको थप सहजताका लागि गाउँपालिकाको समन्वयमा बैंकका कर्मचारीलाई वडा र बस्तीस्तरमै पुर्याएर वितरण गर्ने प्रबन्ध मिलाइएको हो,’ उनले भने।
उनका अनुसार गाउँपालिकाका आठवटै वडा कार्यालयमै पुगेर सामाजिक सुरक्षा भत्ता वितरण गरिएको हो। कनकासुन्दरीमा साउन २ देखि ११ गतेसम्म वडामै पुगेर सामाजिक सुरक्षा भत्ता वितरण गरिएको हो।
आठवटै वडाका लाभग्राहीको कुमारी बैंकमा रहेको खातामा गत वैशाखदेखि असारसम्मको सामाजिक सुरक्षा भत्ता पठाइसकिएको छ। भौगोलिक कठिनाइका कारण गाउँपालिकाको केन्द्रमा रहेको बैंकसम्म आएर भत्ता बुझ्न कठिनाइ भएपछि बैंकका कर्मचारीलाई बस्तीस्तरमा पुर्याएर वितरण गरिएको गाउँपालिकाले जनाएको छ।
पालिकाको केन्द्रसम्म आउन नसक्ने लाभग्राहीहरूको समस्यालाई मध्यनजर गरेर वडा कार्यालयबाट वितरण गरिएको कनका सुन्दरीका प्रमुख प्रशासकीय अधिकृत दिपेन्द्र भण्डारीले बताए। उनका अनुसार कनकासुन्दरी गाउँपालिकाले हरेक सेवामा सेवाग्राहीलाई प्राथमिकता दिने नीति लिएको छ।
वडामै पुगेर सामाजिक सुरक्षा भत्ता गर्दा नागरिकलाई सहज भएको गाउँपालिकाकी उपाध्यक्ष प्रेमकली बुढाको भनाइ छ।
सामाजिक सुरक्षा भत्तामा अनियमितता हुन थालेपछि पछिल्लो समयमा सरकारले लाभग्राहीको खातामै जम्मा हुने व्यवस्था गरेको थियो।
तर पहाड र हिमालका कतिपय जिल्लामा सवारी साधन र नजिक बैक पहुँच नभएकाले सामाजिक सुरक्षा भत्ता प्राप्त गर्ने लाभग्राहीलाई समस्या हुने गरेको थियो।
सामाजिक सुरक्षा भत्तामा अनियमितता हुन थालेपछि पछिल्लो समयमा सरकारले लाभग्राहीको खातामै जम्मा हुने व्यवस्था गरेको थियो।
तर पहाड र हिमालका कतिपय जिल्लामा सवारी साधन र नजिक बैक पहुँच नभएकाले सामाजिक सुरक्षा भत्ता प्राप्त गर्ने लाभग्राहीलाई समस्या हुने गरेको थियो।
कनकासुन्दरी गाउँपालिकाका करिब ३ हजार ३ सय जनाले आर्थिक वर्ष २०८०/०८१ को चौथो त्रैमासिक सामाजिक सुरक्षा रकम प्राप्त गरेका छन्। अन्य जेष्ठ नागरिक भत्ता, जेष्ठ नागरिक (एकल महिला), जेष्ठ नागरिक क्षेत्र, एकल महिला (आर्थिक सहायता), क वर्ग, ख वर्ग (आर्थिक सहायता) र क्षेत्र तोकिएका बालबालिका शीर्षकमा कुल ३ हजार २ सय ९६ जनाले सामाजिक सुरक्षा भत्ता प्राप्त गरेका हुन्।
तीमध्ये अन्य जेष्ठ नागरिक भत्ता शीर्षकमा ७ सय ४१ जना, ४७ जना जेष्ठ नागरिक (एकल महिला) र ६ सय ४६ जनाले जेष्ठ नागरिक क्षेत्र शीर्षकमा भत्ता प्राप्त गरेको शाखा प्रमुख उपाध्यायले बताए।
एकल महिला (आर्थिक सहायता) शीर्षकमा १ सय ६१ जना, क वर्गका १३ जना र ख वर्ग (आर्थिक सहायता) शीर्षकमा ७५ जनाले सामाजिक सुरक्षा भत्ता प्राप्त गरेका छन्।
क्षेत्र तोकिएका बालबालिका शीर्षकमा १ हजार ६ सय ११ जनाले भत्ता प्राप्त गरेका हुन्। कुल १ करोड ८६ लाख ८४ हजार ८ सय ८८ रूपैयाँ सामाजिक सुरक्षा भत्ता वितरण गरिएको हो।
आठ वटै वडामा भत्ता पाउने लाभग्राहीको संख्या ३ हजार ६ सय ८० जना थियो। तीमध्ये अभियानको क्रममा १ हजार ४ सय १८ जनाले वडामै उपस्थित भएर भत्ता बुझेका छन्।
वडा नम्बर १ मा ३ सय ४ जना लाभग्राही रहेकोमा १ सय ७२ जनाले भत्ता वितरण प्राप्त गरेका छन्। वडा नम्बर २ मा ३ सय ९२ मध्ये २ सय ९ जना, वडा नम्बर ३ मा ५ सय ५५ मध्ये १ सय ६८ जनाले प्राप्त गरेको प्रमुख उपाध्यायले बताए।
वडा नम्बर ४ मा ३ सय ९४ जनामध्ये १ सय ७५, वडा नम्बर ५ मा ३ सय ७२ मध्ये १ सय २८ जनाले भत्ता पाएका हुन्। यसैगरी, वडा नम्बर ६ मा ३ सय १ मध्ये,१ सय ५९,वडा नम्बर ७ मा ४ सय ५९ मध्ये १ सय ६७ र वडा नम्बर ८ मा ५ सय १९ लाभग्राहीमध्ये २ सय ४० जनाले भत्ता प्राप्त गरेका छन्।
प्रकाश उपाध्याय । २०८१ साउन १६